Պենդերեցկին ուզենա էլ` չի մոռանա Հայաստանը

«Երեւանյան հեռանկարներ» միջազգային փառատոնի շրջանակներում հունվարի 13-16-ը անվանի դիրիժոր Քշիշտոֆ Պենդերեցկու 80-ամյա հոբելյանի առթիվ Երեւանում անցկացվեց «Քշիշտոֆ Պենդերեցկու օրերը Հայաստանում» խորագրով միջոցառումների շարքը: Երեկ Պենդերեցկու կյանքի եւ գործունեության մասին պատմող «Լաբիրինթոսի արահետներով» ֆիլմի ցուցադրմամբ էլ տեղի ունեցավ միջոցառումների փակման արարողությունը:

Պենդերեցկին Հայաստանից կհեռանա այսօր` իր հետ տանելով ջերմ հուշեր /քանի որ, հիրավի, համերգները կազմակերպված էին բարձր մակարդակով/ եւ մի քանի նվերներ: Պարզվում է` այսօր Մինաս Ավետիսյանի, Հակոբ Հակոբյանի, Մարտիրոս Սարյանի գործերն այնքան էլ «մոդայիկ» չեն, եւ հետո` անհրաժեշտ է ժամանակակիցների նկարները տարածել աշխարհով մեկ: Նկարիչների միության նախագահ Կարեն Աղամյանն, օրինակ, Պենդերեցկուն նվիրեց իր ստեղծագործությունների ալբոմը, որպեսզի, ինչպես նշեց Աղամյանը, Պենդերեցկին հիշի Հայաստանը: Ուշագրավ մի փաստ եւս` ՀԳՄ նախագահ Էդվարդ Միլիտոնյանն էլ Պենդերեցկուն նվիրեց դիրիժորի մասին գրած իր ստեղծագործությունները /հուսանք` ոչ «Է» գրքում ներառված/:

Այո, ժամանակակիցների գործերը տարածելու հիանալի միջոց, ես կասեի` անձնուրաց միջոց: Վստահեցնում եմ` Պենդերեցկին ուզենա էլ` այսուհետ չի կարողանա մոռանալ Հայաստանը: