Չկա որևէ սիրիահայ, որ ուզենա հասնել Երևան ու չհասնի. նախարար

Սփյուռքի նախարար Հրանուշ Հակոբյանն այսօր խորհրդարանում լրագրողներին հայտնեց, որ անցնող մեկ շաբաթվա ընթացքում Սիրիայից Հայաստան է եկել 28 հոգի, այսօր էլ` 5 հոգի: Ըստ նախարարի՝ սիրիահայերին այստեղ ապահովելու երկու սխեմա է գործում:

«Կան ժամանակավոր կացարաններ` 25 տեղով, որոնք մշտապես չենք բնակեցվում: Մի քանի օր պահում ենք եկածներին, հետ տեղափոխում վարձով բնակարաններ: Երկրորդ` կամ մարդիկ, որոնց ընտանիքի կեսը կամ հարազատները այստեղ են բնակվում, նրանց կացարան չեն տանում այս դեպքում»,- նշեց նա:

Ըստ նախարարի` վիճակը ծանր է, ոչ ոք չի կարող ասել, թե հաջորդ պահին ինչ է լինելու այնտեղ: «Ով գալիս է, մենք պարտավոր ենք ամեն ինչ անել, որ նա փողոցում չհայտնվի: Չկա որևէ մեկը, որ ուզենա հասնել Երևան ու չհասնի: Ամեն ինչ մշակված և ճշտված է, գումարի հարցն էլ: Ամեն ինչ կանոնակարգված է, և այնպես չէ, որ մեկը ուզում է գալ ու չի կարողանում, նման բան չկա»,- ընդգծեց Հակոբյանը` հավելելով՝ ազգային իշխանությունը, գլխավոր հյուպատոսությունը, Ավետարանչական ընկերակցությունը, Հայ բարեգործական ընդհանուր միությունը բոլոր հնարավորություններն ունեն, որ ով գումար չուն,ի այնտեղից տեղափոխեն:

Նախարարի խոսքով` սիրիահայ ուսանողների ուսման վարձերը 2 տարի միայն պետությունն է տվել, իսկ հիմա` «Գյուլբենկյան» բարեգործական հիմնադրամի հետ բանակցություններից հետո, նրանք են վճարում, և ուսանողները գրեթե անվճար են սովորում:

Խոսելով սիրիահայերի հիմնական խնդիրների մասին` Հրանուշ Հակոբյանը նշեց, որ դրանք երկուսն են: «Երկու հիմնական խնդիր ունեն՝ բնակարան և աշխատանք. փորձում ենք և՛ անհատապես, և՛ նախարարությունների միջոցով, և՛ գործատուների միջոցով ամեն ինչ անել, որ այդ խնդիրները լուծվեն, և նրանց համար հնարավոր լինի այստեղ ապրելը»,- ասաց նա: