Հայաստանի ճանապարհը դեպի ՄՄ այդքան հեշտ չէ, որքան թվում է. Известия-ի անդրադարձը

Ռուսական Известия-ն անդրադարձել է Հայաստանի՝ ՄՄ-ին միանալու գործընթացին և Մոսկվայում կայանալիք Եվրասիական տնտեսական գերագույն խորհրդի ժողովում` դեկտեմբերի 24-ին, Հայաստանի` Մաքսային միությանն անդամակցելու «ճանապարհային քարտեզի» ստորագրմանը: 

Հոդվածում նշվում է, որ Հայաստանի ճանապարհը դեպի ՄՄ այդքան էլ հեշտ չէ: Ղազախստանի և Բելառուսի առաջնորդները կարող են շարունակել «ընդդիմադիր կեցվածք» ընդունել անգամ «ճանապարհային քարտեզի» ստորագրումից հետո: Որպես հիմնական փաստարկ` նշվում է, որ Հայաստանի՝ ՄՄ մտնելուց հետո չճանաչված ԼՂՀ-ից ընդհանուր տնտեսական տարածություն կարող է ապրանք մուտք գործել, թեև չնչին քանակությամբ:

Հոդվածում նաև  նշվում է, որ նույն  Հայաստանում ևս քիչ չեն մարդիկ, որոնք կասկածում են, որ «ճանապարհային քարտեզն» անթերի է և այդքան կարճ ժամանակահատվածում ճիշտ է մշակվել: