ՀՀ պաշտպանության նախարարն այցելեց ՖԿՀՊԻ

Հայաստանի Հանրապետության պաշտպանության նախարար Սեյրան Օհանյանը  Ուսանողների միջազգային օրվա կապակցությամբ նոյեմբերի 18-ին այցելեց Ֆիզիկական կուլտուրայի հայկական պետական ինստիտուտ:

Այցի սկզբում Սեյրան Օհանյանը ծաղկեպսակ դրեց Արցախի հերոսամարտում զոհված ուսանող-ազատամարտիկների հիշատակը հավերժացնող խաչքարի մոտ: Այնուհետև շրջեց բուհի շենքում, այցելեց ֆիզիկական կուլտուրայի պատմության թանգարան:

Ինստիտուտի նիստերի դահլիճում, որտեղ նախարարի այցի առիթով հավաքված էին բուհի ուսանողները, պրոֆեսորադասախոական կազմը, ՖԿՀՊԻ-ի ռեկտոր, պրոֆեսոր Վահրամ Առաքելյանը ողջունեց ՀՀ պաշտպանության նախարարին և շնորհակալություն հայտնեց այցի համար:

ՀՀ պաշտպանության նախարար, գեներալ-գնդապետ Սեյրան Օհանյանն իր ողջյունի խոսքում ասաց, որ  Հայաստանի ուշադրության կենտրոնում երիտասարդությունն է: Իրենք կարևորում և գնահատում են երիտասարդության ներուժը: Սեյրան Օհանյանը նաև նշեց, որ իր համար մեծ պատիվ է գտնվել այն բուհում, որը 70 տարվա ընթացքում շուրջ 12 հազար շրջանավարտ է ունեցել, ովքեր ոչ միայն ՀՀ-ում, այլ նաև աշխարհի տարբեր երկրներում բարձր են պահել Հայաստանի անունը:

 Դահլիճում էին ինստիտուտի շրջանավարտները, ովքեր ծառայում են ՀՀ զինված ուժերում: Սեյրան  Օհանյանը ելույթի ավարտին ողջունեց նրանց և,  որպես խրախուսանք, 10 օր արձակուրդ տվեց:

Նախարարն այնուհետեւ պատասխանեց ուսանողների և դասախոսների հարցերին:

Հանդիպման վերջում Սեյրան Օհանյանը եւ ՖԿՀՊԻ ռեկտորդ Վահրամ Առաքելյանը  պարգևատրեցին ինստիտուտի լավագույն մարզիկ- ուսանողներին` նրանց հանձնելով պատվոգրեր և հուշանվերներ: «Վազգեն Սարգսյան» մեդալով պարգևատրվեցին ՖԿՀՊԻ դեկաններ` Անահիտ Հարությունյանը, Հոմբերտ Գալստյանը և Կոլյա Բաբայանը:  Իսկ ինստիտուտի ռեկտոր Վահրամ Առաքելյանը պարգևատրվեց «Անդրանիկ Օզանյան» մեդալով: