Պատրաստ եմ համագործակցել Ռոբերտ Ամիրխանյանի հետ. Արամ Սաթյան

Yerkir.am-ն արդեն տեղեկացրել էր, որ երեկ Կոմպոզիտորների միության նախագահ ընտրվեց կոմպոզիտոր Արամ Սաթյանը:

Նորընտիր նախագահը yerkir.am-ի հետ զրույցում նշեց, որ սպասում էր նման արդյունքի, քանի որ արդեն զգացվում էր` մարդիկ ուզում են հավատալ ապագային, նրանք ուզում են օրենքը, ճշմարտությունը, մարդկայնությունը, արժանապատվությունը վերջապես առաջին տեղում տեսնել:

«Այսօր մեր հանրապետությունը գնում է ճիշտ ուղղությամբ. եթե այս փոքր օղակում կարելի է փոփոխություն անել, ուրեմն կարելի է փոփոխության հասնել յուրաքանչյուր ոլորտում: Մենք համոզված ենք, որ, մեր գործը ճիշտ անելով, մենք էլ կնպաստենք դրան»,- ասաց Սաթյանը:

Նա նշեց նաեւ, որ պատրաստ է անել ամեն ինչ` կոմպոզիտորների ստեղծագործական աճին նպաստելու համար Սաթյանը հավելեց նաեւ, որ ինքը ցանկություն ունի համագործակցել Ռոբերտ Ամիրխանյանի հետ, քանի որ, նրա հավաստմամբ, Ամիրխանյանը մեծ փորձ ունի եւ կարող է օգնել իրեն:

Հարցին, թե ո՞րն է լինելու իր առաջին անելիքը միությունում, պատասխանեց, որ առաջին հերթին պետք է ժողով անի: «Պետք է լսեմ բոլորին, հետո կսկսենք որոշել մեր անելիքը: Ես իմ նախընտրական ծրագրում ընդգրկել եմ դրույթներ, որոնք պետք է իրագործեմ, հակառակ դեպքում` ինչպե՞ս եմ նայելու ընկերներիս երեսին»,- ասաց Սաթյանը: