Այն մասին, թե ինչ է նշանակում «Օզբիլիս» ազգանունը

Ֆիզիկական կուլտուրայի հայկական պետական ինստիտուտի դասախոս Արաքս  Մարությանը օրերս իր ֆեյսբուքյան էջում գրառում է կատարել, որը վերաբերում է  ֆուտբոլի  Հայաստանի ազգային հավաքականի և Մոսկվայի «Սպարտակ»-ի կիսապաշտպան Արազ Օզբիլիսի ազգանվանը:

Հայաստանում կայացած Բուլղարիայի հետ հանդիպումից անմիջապես  հետո Մարությանը հանդիպել է Արազ Օզբիլիսին և նրա  ընտանիքի անդամներին, ովքեր Հայաստան էին եկել հատուկ այդ խաղի համար:

«Ինձ բախտ վիճակվեց հանդիպել Օզբիլիսների հետ, որից հետո շատ հետաքրքիր զգացողություններ ունեմ: Մի բան է  մարդուն տեսնել դաշտում, այլ բան`  ընտանիքի անդամների շուրջ: Մի բան է  ուղղակի  արտասանել «Օզբիլիս» ազգանունը` որպես ֆուտբոլիստի ազգանուն, այլ է, երբ իմանում ես,  թե այդ ազգանունն ինչ հետաքրքիր ու խորը պատմություն ունի:

«ՕԶԲԻԼԻՍ»`  նշանակում է  ինքնությունը պահող, պահպանող:  Չեմ ուզում անդրադառնալ պատմության բոլոր մանրամասներին, միայն մեկ դրվագ պատմեմ, որը պատկերացնելիս պարզապես փշաքաղվում եմ:

Արազի հոր պապը, փրկվելով ջարդերց, ապրելով նկուղում, հայերենը չմոռանալու համար ինքն իր հետ հայելու դիիմաց խոսել է  ՀԱՅԵՐԵՆ  և հետագայում, չունենալով ոչ մի փաստաթուղթ, հենց լեզվի շնորհիվ է,  որ ապացուցել է իր ՀԱՅ լինելը: Եվ հենց դա է  պատճառը, որ փաստաթղթեր ձևակերպելիս նրան տվել հենց «Օզբիլիս» (ինքնությունը պահպանող) անունը»,-գրել է Մարությանը:

Yerkir.am-ի խնդրանքով` Արաքս Մարությանը պատմեց ազգանվան մասին  բոլոր այն մանրամասները, որոնք նա լսել էր Օզբիլիսների ընտանիքից:

 «Արազի հոր պապը   ունեցել է ևս 8  եղբայր,որոնցից, ցավոք,  փրկվել է  միայն նա: Այդ ժամանակ նա ընդամնեը 9 տարեկան էր:  Երկար ժամանակ  ապրել է նկուղում ու որպեսզի չմոռանա հայերենը, հայելու առաջ ինքն իր հետ խոսել է հայերեն:

Հետո` տարիներ անց,  օրենք է  հանվել,  ըստ որի՝   ով կներկայացնի փաստաթուղթ,  որ հայ է, կստանա իր փողերն ու հողերը: Քանի որ Արազի հոր պապը ոչ  մի փասթաթուղթ չի ունեցել, նա   լեզվի շնորհիվ է ապացուցել իր հայ լինելը:  Ըստ օրենքի` նրան  տվել են փող, նա էլ այդ  փողը տվել է  իրեն պահող թուրքին՝   ի նշան շնորհակալության, հետո նրանից   գնել է Ռեհան անունով հայ կնոջը և ամուսնացել նրա  հետ: 

Այնուհետև այդ նույն թուրքը   նրանց համար  փաստաթղթեր է պատրաստել և  թղթերում գրել Օզբիլիս ազգանունը»:

Հայաստանի հավաքկանի ֆուտբոլիստ Արազ Օզբիլիսին մեկ անգամ չէ, որ ազգանվան համար օտարերկրացի լրագրողները «թուրք» են անվանել,  սակայն ինքը` Արազը, կտրուկ վերջակետ է դրել այդ հարցին` ասելով. «Ես ՀԱՅ եմ և երբ ստացա Հայաստանի հավաքականում հանդես գալու հրավերը , առանց երկմտելու համաձայնվեցի»: