Արդեն իսկ պարզ է` տրանսպորտը կթանկանա

Երևանի քաղաքապետ Տարոն Մարգարյանը սեպտեմբերի 24-ին որոշում է ընդունել ներքաղաքային ուղևորափոխադրումների վարձի ձևավորման հանձնաժողովի ստեղծման վերաբերյալ:

Որոշման մեջ, մասնավորապես, ասված է. «Ղեկավարվելով «Երևան քաղաքում տեղական ինքնակառավարման մասին» Հայաստանի Հանրապետության օրենքի 57-րդ հոդվածի 1-ին մասի 3-րդ կետով, «Տեղական ինքնակառավարման մասին» Հայաստանի Հանրապետության օրենքի 39-րդ հոդվածի 1-ին մասի 2-րդ կետով, ինչպես նաև Երևանի քաղաքապետի 2013 թվականի հուլիսի 25-ի NN 3722-Ա և 3723-Ա որոշումների կատարումն ապահովելու նպատակով.

1.    Ստեղծել հանձնաժողով` համաձայն հավելվածի:
2.    Հանձնաժողովի նախագահին` ապահովել.

1)    Երևանի ներքաղաքային ուղևորափոխադրումների վարձի ձևավորման, այդ թվում` չափորոշիչների, հաշվարկների և դրանց առնչվող այլ հարցերի, ինչպես նաև վարձի կիրառման մեխանիզմների քննարկումը.
2)    խնդրի առնչությամբ հասարակությանը հուզող հարցերի վերաբերյալ համակողմանի և լիարժեք տեղեկատվության տրամադրումը. 
3)    քննարկման արդյունքներով համապատասխան առաջարկությունների ներկայացումը Երևանի քաղաքապետին:
3.    Սահմանել, որ.
1)    հանձնաժողովի առաջին նիստը գումարվում է սույն որոշումն ուժի մեջ մտնելուց հետո` 5 աշխատանքային օրվա ընթացքում, իսկ հաջորդ նիստերը` ըստ անհրաժեշտության.
2)    հանձնաժողովի նիստն իրավազոր է, եթե նիստին ներկա են անդամների առնվազն կեսը.
3)    քննարկվող հարցերի շուրջ հանձնաժողովի  որոշումներն  ընդունվում են բաց քվեարկությամբ` ներկա մասնակիցների ձայների մեծամասնությամբ: 
4.    Սույն որոշման կատարման կազմակերպումն ու պատասխանատվությունը դնել հանձնաժողովի նախագահի վրա:
5.    Սույն որոշման կատարման հսկողությունն իրականացնում է Երևանի քաղաքապետը»:

Հանձնաժողովի նախագահ է նշանակվել քաղաքապետի տեղակալ Վահե Նիկոյանը, տեղակալ` քաղաքապետի խորհրդական Ալբերտ Գևորգյանը: Հանձնաժողովում ընդգրկված են նաև վարորդների և սպառողների շահերը պաշտպանող մի շարք հասարակական կազմակերպությունների ներկայացուցիչներ, բուհերի դասախոսներ: Ուշագրավ է, որ քաղաքապետը հանձնաժողովում ընդգրկել է նաև քաղաքապետարանի տրանսպորտի վարչության պետ Հենրիկ Նավասարդյանին: Հանձնաժողովի կազմին կարող եք ծանոթանալ` այստեղ: