Արդեն իսկ պարզ էր դատավորի կանխակալ վերաբերմունքը. Ստեփան Հակոբյանի պաշտպանը կբողոքարկի վճիռը

Արդեն հայտնել ենք, որ այսօր Մալաթիա-Սեբաստիա վարչական շրջանների ընդհանուր իրավասության դատարանը Մալաթիայի նախկին թաղապետի որդու՝ Սեդրակ Զատիկյանի սպանությունը պատվիրելու գործում մեղավոր է ճանաչել ԱԺ նախկին պատգամավոր Հակոբ Հակոբյանի (Լեդի Հակոբի) եղբորորդուն` Ստեփան Հակոբյանին և նրան դատապարտել 15 տարվա ազատազրկման:

Yerkir.am-ի հետ զրույցում Հակոբյանի պաշտպան, փաստաբան Երեմ Սարգսյանը հայտնեց, որ սպասում են դատական ակտի օրինակին, որպեսզի տեսնեն, թե դատավորն ինչ ապացույցներ է դրել մեղադրանքի հիմքում, ինչից հետո և կբողոքարկեն վճիռը:

«Մենք հստակ հիմնավորել էինք, որ բոլոր ապացույցներն անթույլատրելի էին, անգամ թույլատրելի համարելու դեպքում մեղքը չէր հիմնավորվում: Գործի մեջ առկա ապացույցները առանց չնչին կասկածի հիմք էին տալիս ենթադրելու, որ Հակոբյանը կարդարացվի, բայց ստացվեց հակառակը»:

Ըստ պաշտպանի` Զատիկյանի սպանության գործով դատավճռով արդեն իսկ պարզ էր դատավորի կանխակալ վերաբերմունքը. «Նախորդով արդեն ապացուցված էր համարվել Ստեփան Հակոբյանի մեղքը, և դժվար թե նույն դատավորը նույն ապացույցները համարեր անթույլատրելի»:

Սարգսյանը հույս հայտնեց, որ Վերաքննիչ դատարանը օբյեկտիվ և արդար դատաքննություն կիրականացնի: