Ոնց որ բռնես` մարդու հացը կտրես. Լեւոն Թոքմաջյան

Տրանսպորտն ամենացավոտ հարցն է. ոնց որ բռնես` մարդու հացը կտրես. Yerkir.am-ի հետ զրույցում նման կարծիք հայտնեց քանդակագործ Լեւոն Թոքմաջյանը` անդրադառնալով վերջին օրերին տրանսպորտի թանկացման հետ կապված իրարանցմանը:

Թոքմաջյանը նշեց, որ թանկացումները բոլորիս ընդհանուր ցավն է եւ, տրանսպորտը թանկացնելով` 50 դրամներով, մեծահարուստներն էլ ավելին կհարստանային:

Քանդակագործի հավաստմամբ` հարկավոր չէր իրար հետեւից այս շղթայական թանկացումներն անել: «Տրանսպորտն այնպիսի բան է, որ ամեն օր օգտագործում ես, իսկ գազի եւ լույսի թանկացման մասին էլ չասեմ: Գազի եւ լույսի թանկացման համը ձմռանը կզգանք. երբ գա մուծումների ժամանակը, կտեսնենք, որ մի պարկ փող ենք թափելու: Մի՞թե կարելի էր ժողովրդի նյարդերի հետ այդ աստիճան խաղալ»,- ասաց Թոքմաջյանը: