Ֆլորա Մարտիրոսյանի ամուսնուն դրդել էին իմ դեմ. Լևոն Թոքմաջյան

Նոյեմբերի 20-ին լրանում է անվանի երգչուհի Ֆլորա Մարտիրոսյանի մահվան երկրորդ տարին:

Դեռ նախորդ տարի, երբ քանդակագործ Լեւոն Թոքմաջյանը քանդակել էր երգչուհու մահարձանը, երգչուհու ամուսինը դեմ էր եղել, որ այն տեղադրվի երգչուհու գերեզմանի մոտ: Ավելին` ինչ-որ ժամանակով քանդակն «անհետացել» էր, սակայն կարճ ժամանակ անց այն կրկին իր տեղում էր:

Yerkir.am-ի հետ զրույցում Լևոն Թոքմաջյանը նշեց, որ քանդակի հետ կապված խոսակցությունները լրիվ հօդս են ցնդել, քանի որ դրանք հիմք չունեին: «Ես վերջերս նորից գնացի ու նայեցի` մի հրաշք քանդակ է: Սա այն դեպքն է, որ սիմվոլիկա է մնացել` նրա մարմնի փարթամությունը, ժպիտը… Մի հրաշք գործ եմ արել: Ուղղակի ամուսնուն դրդեցին իմ դեմ, որովհետև նրանք մեկ տարի իմ կողքը կանգնած են եղել, տեսել իմ աշխատելաոճը: Հասկանում եք, չէ՞, ես լուսանկարչական պատճեն չեմ անում, կերպար եմ ստեղծում»,- ասաց Թոքմաջյանը` հավելելով, որ երգչուհու ամուսնու մահից հետո քանդակի շուրջ ծագած խոսակցությունները հանդարտվել են: