Ժողովուրդը մի լավ խոսք ունի՝ եղունգ ունես, գլուխդ քորիր, մեր արվեստագետներն «այդ օրի» են. Լևոն Թոքմաջյան

Ժողովուրդը մի լավ խոսք ունի՝ եղունգ ունես, գլուխդ քորիր, մեր արվեստագետներն «այդ օրի» են՝ ով եղունգ ունի, իր գլուխն է քորում, ով էլ չունի՝ մնում է անլվա. լրագրողների հետ զրույցում ասաց քանդակագործ, ՀՀ ժողովրդական նկարիչ Լևոն Թոքմաջյանը:

Մյուս կողմից, ըստ նրա, հասկանալի է նաև, որ արվեստը ձևավորվում է ինքն իրենով, օրինակ` երբ ֆրանսիական իմպրեսիոնիզմը Ֆրանսիայում իր տեղը զբաղեցրեց, ո՞վ է հիշում, թե այդ ժամանակ Ֆրանսիայի վարչապետը, նախագահը կամ մշակույթի նախարարն ով էր:

«Սերժ Սարգսյանն ընդունակ մարդ է, եթե նա ուզի, կարող է շատ բան փոխել: Բայց  քանի դեռ այսօր հասարակությունը, ժողովուրդն ու պետական մարմինները տարանջատված են իրարից, շատ բանի չենք հասնի: Այսինքն՝  ինքներս պետք է գլխներիս ճարը տեսնենք»,- ասաց քանդակագործը:

Նրա խոսքով՝ կերպարվեստը դարձել է կուսակցությունների համար կայացման վայր, և քանի գնում՝ ոչ կերպար է մնում, ոչ էլ` արվեստ:

Թոքմաջյանի գնահատականով՝ Հայաստանն ուզում է Եվրոպա դուրս գալ «ուշացած» և չպահպանելով մեր ազգայինը: «Մեր ակունքները պետք է պահպանել: Հայկական ասելով՝ նկատի չունեմ՝ չարոխներ, այլ ոգին ու մտածողությունը: Ուզում եմ խորություն տեսնել մշակույթում: Մենք ունենք արժեքներ, բայց, ցավոք, շարունակությունը չեմ տեսնում»,- նշեց քանդակագործը: