Ամբողջ ժողովուրդը նախագահին դեմ լինել չի կարող. Գալուստ Սահակյան

Այսօր ՀՀԿ ԳՄ նիստից առաջ լրագրողների խնդրանքով ԱԺ ՀՀԿ խմբակցության ղեկավար Գալուստ Սահակյանն անդրադարձավ Սուրեն Խաչատրյանի այն հայտարարությանը, թե ինքն է անձամբ առաջադրել Վահե Հակոբյանի թեկնածությունը:

«Որևէ մեկը մեր իրականության մեջ իրավունք չունի որեւէ մեկի թեկնածությունն առաջադրելու: Պարզապես կարող է կարծիք հայտնել եւ ասել, որ այս կամ այն թեկնածուն ավելի լավն է: Վահե Հակոբյանի ընտրությունը կատարվել է Գործադիր մարմնի նիստում` երկրի նախագահի կողմից, եւ բոլորս էլ դրական ենք վերաբերվել այդ ընտրությանը»,- հայտարարեց Գալուստ Սահակյանը:

Yerkir.am-ի դիտարկմանը, որ ՀՀԿ-ում որեւէ մեկը նախագահի կարծիքին դեմ չի արտահայտվում, Սահակյանը  պատասխանեց, որ փորձառության, անցած ճանապարհի շնորհիվ Սերժ Սարգսյանը կարողանում է օբյեկտիվ որոշումներ կայացնել: «Դեմ լինելու խնդիրն արդեն ներկուսակցական հարց է, բայց այն, որ Սերժ Սարգսյանը կուսակցությունում լուրջ հեղինակություն է, փաստ է»,- վստահեցրեց նա:

Մեր թղթակիցը փորձեց պարզել, թե Սահակյանը հիշո՞ւմ է` վերջին անգամ երբ է դեմ արտահայտվել նախագահին, ինչին ի պատասխան նա ասաց. «Ոչ միայն մենք, այլեւ ամբողջ ժողովուրդը նախագահին դեմ լինել չի կարող, քանի որ նախագահն իր կայացմամբ ապացուցել է, որ տրամադրված է հասարակական-քաղաքական կյանքում լուրջ փոփոխություններ անել»: