Ժողովուրդը վատ է ապրում, և այդ վատից ՀՀԿ-ն է տուժում. Գալուստ Սահակյան

Մարտի 1-ի տարելիցին նվիրված` ՀԱԿ-ի նախաձեռնած հանրահավաքը ԱԺ ՀՀԿ խմբակցության ղեկավար Գալուստ Սահակյանը ավելի նորմալ կհամարեր, «եթե հավաքված մարդիկ պարզապես հիշատակի միջոցառում անեին, ձոն հյուսեին ու խոսք ասեին»:

Yerkir.am-ի հետ զրույցում Գալուստ Սահակյանը հայտարարեց, որ ժողովրդի այն մասը, որը հավաքվել էր այդ օրը Ազատության հրապարակում, ուզում էր լուծել միակենտրոն խնդիրներ: «Այն քաղաքական ուժերը, որ միտինգ են հրավիրում, այլ խնդիրներ են ուզում լուծել, ինչը, մյուս կողմից, օգնում է իշխանություններին, որ ևս մեկ անգամ փորձեն արագացնել այն, ինչը պատրաստվում են: Որևէ քաղաքական ուժ իր խնդիրները լուծելու համար ժողովրդին պետք է չօգտագործի: Քաղաքական ուժերը նրա համար են, որ ամեն ինչ անեն, որպեսզի ժողովրդի համար մի բան անեն: Ժողովուրդը վատ է ապրում, և այդ վատից Հանրապետական կուսակցությունն է տուժում, որովհետև պատասխանատուն ինքն է, բայց քաղաքական ուժերն էլ չպետք է օգտվեն դրանից»,- ասաց նա: