Հայաստանը կիսաավտորիտար երկիր է. Freedom House

Freedom House միջազգային իրավապաշտպան կազմակերպությունը հրապարակել է «Անցումային շրջանում գտնվող երկրներ-2013» զեկույցը 29 երկրի մասին:

Փաստաթղթում գնահատվել են մի շարք ոլորտներ, այդ թվում` ընտրական գործընթացները, քաղաքացիական հասարակությունը, դատարանների անկախությունը, կոռուպցիան եւ այլն:

Արձանագրված ցուցանիշների համաձայն` երկրները բաժանվել են 5 խմբի: Այսպես`

ժողովրդավարական երկրներ` Սլովենիա, Էստոնիա, Լատվիա, Չեխիա, Լեհաստան, Սլովակիա, Հունգարիա

կիսաժողովրդավարական երկրներ` Բուլղարիա, Ռումինիա, Խորվաթիա, Սերբիա, Մոնտենեգրո, Մակեդոնիա

անցումային կառավարություններ կամ հիբրիդային վարչակարգեր` Ալբանիա, Բոսնիա, Վրաստան, Մոլդովա, Ուկրաինա

կիսաավտորիտար երկրներ` Կոսովո, Հայաստան, Ղրղզստան

ավտորիտար վարչակարգեր`Ռուսաստան, Տաջիկստան, Ղազախստան, Ադրբեջան, Բելառուս, Թուրքմենստան, Ուզբեկստան:

Հայաստանի մասով զեկույցում նշվում է, որ 2013-ի նախագահական ընտրություններին երկու հիմնական ընդդիմադիր կուսակցությունների անհասկանալի չմասնակցությունը ի չիք դարձրեց իրապես մրցակցային ընտրություններ անցկացնելու հույսը: Միաժամանակ, Հայաստանը բարելավել է իր դիրքը տեղեկատվական դաշտի ոլորտում:

Իսկ Ադրբեջանի վերաբերյալ նշվում է, որ հայ սպային կացնահարած Ռամիլ Սաֆարովին ներում շնորհելն ու հերոսացնելը հնարավորություն չեն տվել առաջընթաց արձանագրել Ղարաբաղյան կարգավորման գործընթացում: