Հայրիկյանի դեմ մահափորձի գործով ամբաստանյալը չի՞ ընդունում դեղահաբերը

ԱԻՄ առաջնորդ Պարույր Հայրիկյանի դեմ մահափորձի գործով այսօրվա դատական նիստին չէին ներկայացել ամբաստանյալներ Վարդան Սեդրակյանը,  Սամվել Հարությունյանը և Խաչատուր Պողոսյանը: Վերջինիս վերաբերյալ դատարանը գրություն էր ստացել ՀՀ ԱՆ «Երևան-Կենտրոն» քրեակատարողական հիմնարկից: Ըստ այդմ` ամբաստանյալ Պողոսյանը, ով տառապում է շաքարային դիաբետ հիվանդությամբ, առողջական խնդիրներ ունի և չի կարող ներկայանալ դատական նիստին:

Մեղադրող դատախազ Արամ Ամիրզադյանն այդ առնչությամբ հայտարարեց, որ ամբաստանյալը դեռ երեկվա նիստին  ասել է, թե այսօր նախատեսված է ինչ-որ անալիզների հանձնում, սակայն, ըստ  իր տեղեկությունների,  Պողոսյանի համար անալիզների հանձնում կամ այլ  բժշկական ստուգում նախատեսված չէ:

«Ես չեմ ուզում միտումնավոր գործողություններ կիրառեմ»,- ասաց դատախազը և  թվեց շաքարային դիաբետի համար օգտագործվող երեք դեղերի անուններ, որոնք, ըստ նրա, որոշակիորեն պետք է բարելավեին հիվանդի վիճակը: Սակայն,  մեղադրողի կարծիքով, ամբաստանյալը հնարավոր է այդ դեղահաբերը չի ընդունում:

Ա. Ամիրզադյանը այդ կապակցությամբ համապատասխան գրություն ներկայացրեց դատարանին:   

Դատավոր Գագիկ Պողոսյանը, հիմք ընդունելով ամբաստանյալների բացակայությունը, դատական նիստը հետաձգվեց և նշանակվեց հունիսի 17-ին: