Շեշտը չի դրվում ՀՀԿ-ի վրա, որովհետեւ Տարոն Մարգարյանն առաջին հերթին երեւանցի է. Շուշան Պետրոսյան

Yerkir.am-ի զրուցակիցն է ՀՀԿ-ական պատգամավոր Շուշան Պետրոսյանը:

- Տիկի'ն Պետրոսյան, մի քանի օրից Երեւանի ավագանու ընտրություններն են: Ինչպիսի՞ ընտրություններ եք կանխատեսում եւ ինչպե՞ս եք գնահատում Տարոն Մարգարյանի շանսերը:

- Ճիշտն ասած` ես այս շրջանում զբաղված էի ուրիշ գործերով, բայց ամեն դեպքում, շփվելով ժողովրդի հետ, ես գիտեմ եւ հստակ տեսնում եմ, որ ժողովուրդն օբյեկտիվորեն շատ սիրում է Տարոն Մարգարյանին: Կարծում եմ, որ նա հաղթելու բավական մեծ շանս ունի, որովհետեւ իսկապես շատ լավ քաղաքապետ է, այն առումով, որ իսկապես սիրում է իր գործը, աշխատասեր է շատ, իսկապես Երեւանի նվիրյալ է:

- Քարոզարշավի հիմնական շեշտը դրվեց Տարոն Մարգարյան անձի վրա, ՀՀԿ-ի անունը շատ քիչ է շոշափվում…

- Իհարկե:

- Բայց սրանք համամասնական ընտրակարգով ընտրություններ են, եւ ընտրում են ոչ թե անձի, այլ կուսակցություններ: Այն, որ ՀՀԿ-ն քարոզչության շեշտը դրել է Տարոն Մարգարյանի վրա, հնա՞րք է:

- Հնարք չէ, պարզապես իր տեսակն է այդպիսին, Տարոնի տեսակն է այդպիսին: Ինքը, քաղաքապետ լինելով, որպես Հանրապետական կուսակցության ներկայացուցիչ չի մոտեցել հարցին, ինքը որպես քաղաքի տեր է մոտեցել հարցին, այսինքն` բոլոր հարցերին, բոլոր կողմերից:

- Բայց նա գլխավորում է ՀՀԿ համամասնական ցուցակը:

- Ի՞նչ կապ ունի դա, ես էլ եմ Հանրապետական կուսակցության անդամ:

- Տիկի'ն Պետրոսյան, մայիսի 5-ին ընտրվելու են կուսակցություններ, այս ընտրությունները համամասնական ընտրակարգով ընտրություններ են:

- Շատ լավ, ես Ձեզ բացատրեմ, Դուք դարձյալ ուզում եք կապել… Այո, շեշտը չի դրվում ՀՀԿ-ի վրա, որովհետեւ ինքն առաջին հերթին երեւանցի է, եւ ինքը հենց այդպես է մոտենում հարցին:

- Փաստորեն, դա է պատճառը` առաջին հերթին երեւանցի է, հետո` ՀՀԿ-ական:

- Ես այդպես եմ կարծում, որովհետեւ ինքն իր տեսակով այդպիսին է` երեւանցի է նախեւառաջ: Ես` ինքս, այդպիսին եմ իմ տեսակով, մենք նույն քաղաքում մեծացել ենք իրար հետ: Ես առաջին հերթին հայ եմ, երեւանցի եմ, հետո նոր` ՀՀԿ ներկայացուցիչ:

- Բայց ամեն դեպքում, ուզի, թե չուզի, իշխող կուսակցության քաղաքապետն է, իշխանության ցուցակն է գլխավորում:

- Հետո ինչ, իսկ ո՞վ է ասել, որ իշխող կուսակցությունն անպայման վատն է, ո՞վ է ասել, դա ի՞նչ քառակուսի տրաֆարետային մոտեցում է:

- Բայց չէ՞ որ դուք` ՀՀԿ-ականներդ, ամեն կերպ փորձում եք թաքցնել այն պարզ իրականությունը, որ նա ՀՀԿ-ական է:

- Իսկ չե՞ք կարող հարցին ուղղակի մոտենալ որպես երեւանցի… Ինքը լավ քաղաքապետ է, եւ ես ուզում եմ, որ նա անցնի: Կարո՞ղ եք ուղղակի այդ տեսանկյունից մոտենալ հարցին:

-Ոչ:

-Ինչո՞ւ ոչ, ինչո՞ւ…

- Տիկի'ն Պետրոսյան, ասածն ընդամենը այն է, որ ընտրում ենք կուսակցություններ, ոչ թե Տարոն Մարգարյանին…

- Շատ լավ, ընտրում ենք քաղաքապետի:

- Հնարավոր է` Տարոն Մարգարյանը բավարար չափով ձայներ չհավաքի եւ քաղաքապետ չընտրվի, ավելի ճիշտ` ՀՀԿ-ն բավարար չափով ձայներ չհավաքի:

- Դուք, փաստորեն, համառում եք...

Երբ կրկին «համառեցինք», որ մայիսի 5-ի ընտրությունները համամասնական ընտրակարգով են, մեր զրուցակիցը պարզապես հեռացավ…

Զրուցեց Ագնեսա ԽԱՄՈՅԱՆԸ