Աշխատող մարդն է սխալվում. Տարոն Մարգարյանն` իր մասին

Գործող քաղաքապետ, Երեւանի ավագանու ընտրություններում ՀՀԿ համամասնական ցուցակը գլխավորող Տարոն Մարգարյանը նախընտրական քարոզարշավի շրջանակներում այսօր հանդիպեց Քանաքեռ-Զեյթուն վարչական շրջանի բնակիչների հետ: Իր ելույթում նա նախ հայտարարեց, որ բազում ծրագրեր են իրականացվել, բայցեւ նշեց, որ դեռ խնդիրներ կան, որոնց լուծման համար ժամանակ է պետք, իսկ թիմն այդ ուղղությամբ «աշխատում է օր ու գիշեր»:

Տարոն Մարգարյանն անդրադարձավ վերջին տարիների համար «աննախադեպ` ասֆալտապատման աշխատանքներին» եւ հայտարարեց, որ 4 մլն քառ. մետր ասֆալտապատման աշխատանք է կատարվել: Նա վստահեցրեց, որ իրենց թիմի համար «բոլոր բակերն են հարազատ, եւ բոլոր բակերը պետք է լավը դարձնեն»:

Տարոն Մարգարյանը հայտարարեց նաեւ, որ իրենց թիմն ապրում է երեւանցիների դարդ ու ցավով, եւ այնպես են անելու, որ երեւանցին դարդ ու ցավ, կոմունալ խնդիրներ չունենա, ամեն վարչական շրջան ունենա իր «Կենտրոնը»:

«Մենք չենք եկել խոստումներ տալու, մենք եկել ենք հաշվետու լինելու»,- հայտարարեց գործող քաղաքապետը:

Նա եւս մեկ անգամ ընդգծեց, որ թերություններ եղել են, եւ պետք է դրանք շտկել, նաեւ հայտարարեց, որ աշխատող մարդն է սխալվում: «Ես ձեզնից մեկն եմ»,- ասաց Տարոն Մարգարյանը եւ խնդրեց, որ մայիսի 5-ին բնակիչները քվեարկեն իրենց օգտին, քանի որ ունեն փորձ, կատարած աշխատանք: