Նոր գրախանութի առաջին գնորդը Տարոն Մարգարյանն է եղել

Հայաստանի գրողների միության նախաձեռնությամբ բացվել է նոր գրախանութ` «Նոր գիրք» անվամբ: Գրախանութի հանդիսավոր բացումն արել է Երևանի քաղաքապետ Տարոն Մարգարյանը:

Ժամանակակից հայ և արտասահմանյան գրողների գրքերի վաճառքի կազմակերպման նպատակով բացված գրախանութում ընթերցողներին հնարավորություն կընձեռվի ժամանակ առ ժամանակ նաև հանդիպել ժամանակակից հայ գրողների հետ:

«Բնական է, որ մեր կողմից առանձնակի է կարևորվում նաև գրախանութների դերն ու մայրաքաղաքում դրանց քանակի ավելացումը, ինչն իր հերթին լուրջ խթան կհանդիսանա գրքի և ընթերցանության զարգացման հարցում: Քաղաքապետարանը պատրաստ է աջակցել բոլոր այն անհատներին, ովքեր մայրաքաղաքում գրախանութներ բացելու ցանկություն կունենան»,- նշել է քաղաքապետը:

Ի դեպ, քաղաքապետը նաեւ եղել է գրախանութի առաջին գնորդը` գնելով հայ մեծանուն գրողների հեքիաթների ժողովածուներից: