Քաղաքական կատականի

Մականուն

Վերջին շրջանում Ազատության հրապարակում Րաֆֆու հանրահավաքները պարբերաբար ու ջանասիրաբար խանգարում է Հայաստան անունով մի տատիկ, որին հանրությունը կնքել է «ՀՀԿ-ի Հայաստան տատի» անունով: Ասում են` նույնիսկ մականուն են դրել` ՀՀԿ-ի Ապահով Հայաստան տատի:

Աստված`վերից

Մամուլը հաղորդում է, որ երիտասարդ ամուսինները գողություն են կատարել Ազգային ժողովի պատգամավոր Սամվել Ալեքսանյանին պատկանող «Երևան սիթի» ցանցին պատկանող խանութներից մեկից: Հայտնի չէ` պատմությունն ինչով է ավարտվել, բայց ասում են` Աստված վերևից տեսել` զարմացել է:

Շտաբսը

Թեև փառապանծ Հանրապետական Էդուարդ Շարմազանովը կյանքում բանակի երես չիտեսել, բայց մարտական մեդալներից բացի` օրերս Տարոն Մարգարյանի քաղաքապետ վերընտրվելու նպատակով շտաբս-կապիտանի կոչում էլ է ստացել:

Ականավոր-մականավոր

Նկատի ունենալով այն մեթոդները, որոնցով ղեկավարվում է «Բարգավաճ Հայաստան» կուսակցությունն ու հատկապես Ազգային ժողովի նրա խմբակցությունը, այս կուսակցության առաջնորդին նույնիսկ կուսակցական ընկերներն են վարանում շնորհել «ականավոր» տիտղոսը` առայժմ բավարարվելով «մականավոր»-ով:

Անհայտ պատկանելություն

Լրատվամիջոցները հաղորդում են, որ խորհրդարանական և նախագահական ընտրություններից հետո ՀՀԿ-ն թևերի է բաժանվել, և այժմ այնտեղ «գույքագրում» է կատարվում: Վերջինս այնքան էլ հարթ չի ընթանում. մասնագետները դժվարանում են գույքագրել, զորօրինակ,  Վիկտոր Դալլաքյանի կաստյում-շալվարը, չկողմնորոշվելով` այսուհետ դա ՀՀԿ-ի՞, թե՞ նաև նախագահականի նյութական արժեք է:

Լևոն Սարգսյան