Զատիկյանի սպանության պատվերի գործով կարևոր վկան հանրապետությունում չէ

Մալաթիայի նախկին թաղապետի որդու՝ Սեդրակ Զատիկյանի սպանության պատվերի գործով այսօրվա դատական նիստին չէր ներկայացել պաշտպանական կողմի ներկայացրած վկա Արմեն Բեկջանյանը: Պարզվում է, որ նրան ուղարկված ծանուցագիրը չի հասել հասցեատիրոջը և հետ է վերադարձվել դատարան:

Ամբաստանյալ Ստեփան Հակոբյանի  պաշտպան Երեմ Սարգսյանը հայտնեց, որ վկայի հարազատներից տեղեկացել է, որ Ա. Բեջանյանը հանրապետությունում չէ և հնարավոր է` ուշ վերադառնա, սակայն միաժամանակ նշեց, որ ինքը դա հաստատելու համար որևէ փաստաթուղթ չունի: Պաշտպանը միջնորդեց հրապարակել Բեջանյանի` նախաքննության ընթացքում տված ցուցմունքը, քանի որ պարզ չէ, կկարողանա՞, արդյոք, վկան ներկայանալ հաջորդ կամ մյուս դատական նիստերին:

Մեղադրող դատախազն ու Սեդրակ Զատիկյանի իրավահաջորդի ներկայացուցիչ Վաղարշակ Գևորգյանը առարկեցին և միջնորդեցին նիստը հետաձգել: Մալաթիա-Սեբաստիա վարչական շրջանի դատարանը, դատավոր Տիգրան Պետրոսյանի նախագահությամբ, բավարարեց մեղադրական կողմի միջնորդությունը և դատական նիստը հետաձգեց մինչև մարտի 28-ը: Դատավորը հավաստիացրեց, որ իրենք միջոցներ կձեռնարկեն` վկային մեկ անգամ ևս պատշաճ ծանուցելու համար:

Հարկ է նշել, որ այս գործով դատական նիստերն անցնում են լարված մթնոլորտում: Նիստերի մեկնարկից առաջ անխուսափելի են  դահլիճ մուտք գործելու համար հրմշտոցներն ու միմյանց հասցեին հնչող սպառնալիքները: Ավելին` այսօր տուժողի հարազատները yerkir.am -ի հետ զրույցում դժգոհեցին դատական նիստերի կազմակերպվածությունից: Նրանց դուր չէր եկել հատկապես այն հանգամանքը, որ իրենք և ամբաստանյալի կողմնակիցները նստում են միևնույն շարքում:

Հիշեցնենք, որ Ստեփան Հակոբյանը մեղադրվում է ՀՀ քրեական օրենսգրքի 104 հոդվածի 6 և 7-րդ կետերով: Նախաքննության համաձայն` Վահան Զատիկյանի որդու՝ Սեդրակ Զատիկյանի սպանությունը կազմակերպել է նա` վերջինիս հետ ունեցած անձնական տարաձայնությունների պատճառով: