Զատիկյանի սպանության պատվերի գործով ամբաստանյալը հետվիրահատական շրջանում է

Մալաթիա-Սեբաստիա համայնքի նախկին թաղապետ, ԱԺ նախկին պատգամավոր Վահան Զատիկյանի ավագ որդու` Սեդրակ Զատիկյանի սպանության պատվերը տալու համար մեղադրվող Ստեփան Հակոբյանը դեռևս հետվիրահատական շրջանում է և չի կարող մասնակցել դատավարություններին: Հակոբյանը վիրահատվել է մոտ 15 օր առաջ  «Դատապարտյալների հիվանդանոց» քրեակատարողական հիմնարկում: Նախորդ` հունիսի 6-ի նիստին ևս ամբաստանյալը չէր ներկայացել:

Հակոբյանի պաշտպան Երեմ Սարգսյանը հույս հայտնեց, որ մինչև հաջորդ դատական նիստն իր պաշտպանյալի վիճակը կբարելավվի, և նա կներկայանա դատարան:

Ի դեպ, այսօրվա նիստին չէր ներկայացել նաև մեղադրող դատախազ Արմեն Մարուխյանը:

Նշենք, որ ավարտվել է վկաների հարցաքննության փուլը, և եթե հաջորդ նիստին այլ խոչընդոտներ ի հայտ չգան, դատարանը կլսի կողմերի ճառերը:

Մալաթիա-Սեբաստիա վարչական շրջանների ընդհանուր իրավասության դատարանը` դատավոր Տիգրան Պետրոսյանի նախագահությամբ, հետաձգեց այսօրվա նիստը և նշանակեց հունիսի 27-ին:

Հիշեցնենք, որ Ստեփան Հակոբյանը մեղադրվում է ՀՀ քրեական օրենսգրքի 104 հոդվածի 6 և 7-րդ կետերով, այն է` սպանություն, որը կատարվել է մի խումբ անձանց կողմից, ինչպես նաև սպանություն, որը կատարվել է շատերի կյանքի համար վտանգավոր եղանակով: Ստեփան Հակոբյանի նկատմամբ մեղադրանք է առաջադրվել և նախաքննությամբ պարզվել է, որ սպանությունը կազմակերպել է Ստեփան Հակոբյանը՝ Վահան Զատիկյանի որդու՝ Սեդրակ Զատիկյանի հետ ունեցած անձնական տարաձայնությունների պատճառով: