ԱՄՆ-ը Հայաստանին կոչ է անում նայել դեպի Արեւմուտք

Հայաստանում ԱՄՆ դեսպանատան առաքելությունն է օգնել Հայաստանին առաջընթաց ունենալ որպես ժողովրդավարական, բարգավաճող եւ անվտանգ երկիր. YouTube-ի իր տեսաբլոգում հայտարարել է ՀՀ-ում ԱՄՆ դեսպան Ջոն Հեֆերնը` ներկայացնելով անցյալ տարվա դեկտեմբերին ԱՄՆ հայ համայնքի հետ հանդիպումների արդյունքները:

Հեֆերնը տիկնոջ հետ այցելել էր Լոս Անջելեսի, Սան Ֆրանցիսկոյի, Բոստոնի եւ Նյու Յորքի հայկական համայնքներ:

Նրա խոսքերով` ամերիկահայերը շատ հետաքրքրված են այսօրվա Հայաստանով եւ հայ ժողովրդի առջեւ ծառացած մարտահրավերներով: Հեֆերնի ուղերձը նրանց հետեւյալն էր. «Ամերիկա-հայկական հարաբերություններն ուժեղ են: Մեր առաքելությունն այստեղ այն է, որ օգնենք Հայաստանին` հաջողելու որպես ժողովրդավարական, բարգավաճ եւ անվտանգ երկիր, ինչը մենք անում ենք ներքին բարեփոխումների խթանման միջոցով` օգնելով Հայաստանին ստեղծելու հնարավորություններ եւ տարբերակներ եւ կոչ անելով նրան նայել դեպի Արեւմուտք»:

«Մենք ցանկանում ենք օգնել Հայաստանին գտնել տարբերակներ, քանի որ ոչ մի երկիր չի կարող իրեն թույլ տալ կախված լինել միայն մեկ սահմանից կամ միայն մեկ գործընկերոջից»,- հավելել է դեսպանը:

Հեֆերնի խոսքերով` ամերիկահայության հետ հանդիպումների ժամանակ հարց է հնչել, թե ինչո՞վ նրանք կարող են օգնել: Դեսպանը նշում է, որ հարկավոր է խորացնել տնտեսական կապերը առեւտրի եւ ներդրումների միջոցով տարբեր ոլորտներում: