Փոխարժեքներ
01 10 2024
|
||
---|---|---|
USD | ⚊ | $ 387.29 |
EUR | ⚊ | € 433.34 |
RUB | ⚊ | ₽ 4.17 |
GBP | ⚊ | £ 519.2 |
GEL | ⚊ | ₾ 141.99 |
Համաշխարհային սիրողական բռնցքամարտի պատմության մեջ շատ չեն այն ընտրյալները , որոնց անվան հիշատակումն իսկ ժամանակին ալեկոծել է տարբեր երկրների մարզադահլիճները, իսկ մեծ ռինգից հեռանալուց հետո մարզաշխարհը չի մոռացել նրանց:
Այդպիսի եզակի բռնցքամարտիկի օրինակ էր բարձր ու բազմապիսի տիտղոսների տեր, ԽՍՀՄ սպորտի վաստակավոր վարպետ, Երևանի պատանի բռնցքամարտիկների օլիմպիական հերթափոխի մարզադպրոցի հիմնադիր տնօրեն Վլադիմիր Ենգիբարյանը: Նրա վիրտուոզ տեխնիկայով, ակնթարթային ռեակցիայով , մրցակցին հասցրած հուժկու ու նպատակային հարվածներով հիացել են բազում երկրների մարզասերներ: Բաց կեցվածքով մենամարտելու նրա առանձնահատկությունների, տարածության ֆենոմենալ զգացողության և սիրողական բռնցքամարտում նրա կատարած հեղաշրջման մասին արտահայտվել են բազմաթիվ մասնագետներ:
1956 թ. հոկտեմբերի համարում Անգլիայի «Բոքսինգ նյուզ» ամսագիրը սովետական մարզիկին անվանել է սիրողական բռնցքամարտի հպարտությունը. «Նա համեստ է , աշխատասեր և ունի ֆիզիկական հիանալի տվյալներ»,- գրում է ամսագիրը:
«Նրա ոտքերի հրաշալի աշխատանքը հիշեցնում է հռչակավոր Ջո Լուիսին, իսկ բացառիկ արագ ռեակցիան ու հարվածների բազմազանությունը միայն իրեն են բնորոշ»:
Ֆրանսիական «Էկիպ» թերթի բնորոշմամբ` գրեթե բոլորն են ցանկացել բռնցքամարտել Ենգիբարյանի նման, բայց ոչ բոլորն են կարողացել, որովհետև չեն տիրապետել տարածության այնպիսի զգացողության և բացառիկ շարժունակության, ինչպես ինքը` «Սովետական լավագույն բռնցքամարտիկը»:
1956 թ. Մելբուռնի օլիմպիական խաղերում երևանցին ԽՍՀՄ առաջին բռնցքամարտիկն էր, որը նվաճեց օլիմպիական ոսկե դափնին` բացահայտ առավելությամբ հաղթելով ամերիկացի Ջո Շոուին, ֆրանսիացի Սոլյուդեն Լոուբշերին և իտալացի Ֆրանկո Նենչիին, մյուսներին: Ուշագրավ է, որ պարտվողները չեն տխրել , իսկ իտալացի մարզիկը նույնիսկ հայտարարել է, որ Ենգիբարյանի նման վարպետից կրած պարտությունը նշանակում է անցնել լավ դպրոց:
ԽՍՀՄ բազմակի, Եվրոպայի եռակի և օլիմպիական խաղերի չեմպիոն Ենգիբարյանը 263 հանդիպումներից տանուլ է տվել միայն 13-ը , իսկ 105 մենամարտ ավարտել է բացահայտ առավելությամբ:
Երևանցու բացառիկ մրցավարական շնորհքն ու գործունեությունը նույնպես գնահատվեցին ըստ արժանվույն և նրան շնորհվեց միջազգային բարձրագույն կարգի մրցավարի կոչում:
Վերջին անգամ Ենգիբարյանը ԱՄՆ-ից ծննդավայր եկավ անցյալ տարի ` Հայաստանի ազգային օլիմպիական կոմիտեի նախագահ Գագիկ Ծառուկյանի հրավերով: Վարպետն արդեն վատառողջ էր, ինպես ասում են, կեցվածքը օլիմպիական չէր:
Մարզասերը լեգենդար վարպետի բեմելը դիմավորեց բուռն, երկարատև ծափերով: Սա նաև երախտապարտ մարզասերի գնահատականն էր բռնցքամարտի գրոսմայստերին, որն ավաղ հնչեց իբրև հրաժեշտի ծափահարություն:
Խոնարհում ու փառք քո հիշատակին, անմոռանալի Վլադիմիր Ենգիբարյան: Դու անմահ ես, քանզի քո անունը ոսկե տառերով է գրված հայկական սպորտի օլիմպիական պատմագրքում: