Նախագահը բարկացել է` հանրահավաքներին երեխաներ այլեւս չեն լինի

Մինչև վերջերս Սերժ Սարգսյանի հանրահավաքները  մարդաշատ դարձնելու համար հանրապետականներն ապավինում էին հանրապետության դպրոցների`  ՀՀԿ-ական տնօրենների օգնությանը, ովքեր  ջանք ու եռանդ չէին խնայում` «Ապահով Հայաստանի» դրոշներով և տերևներով զարդարված աշակերտներին նախագահի հանրահավաքներին ներկայացնելու համար:  

Սակայն այս հանգամանքը բնավ դուր չի եկել Սերժ Սարգսյանին, ավելին` համացանցում ակտիվորեն տարածված «կարմիրծովյան» հանրահավաքի (երբ նախագահի մուտքը համեմատվեց Մովսեսի գալստյան հետ) տեսանյութից հետո նախագահը բարկացել է:

Yerkir.am-ի հավաստի տեղեկություններով` մարզպետները զգուշացրել  են իրենց մարզերի ՀՀԿ շտաբի պետերին, որ հանրահավաքներին  երեխաներ բերելու դեպքում խստորեն կպատժվեն: Այս հանգամանքը  զգալիորեն բարդացրել  է հանրահավաքների կազմակերպիչների աշխատանքը:  Այժմ նրանք ստիպված են ապահովել պետական աշխատողների մեծ մասի ներկայությանը, ինչը, բնականաբար, շատ ավելի բարդ է, քան աշակերտներին բերելը:

Նախագահի այս «բարեփոխումը» միաժամանակ հեշտացրել է  հանրահավաքները նկարահանող օպերատորների գործը, ովքեր  այժմ ստիպված չեն լինի փնտրել երիտասարդների կամ տարիքով քաղաքացիների` պատրանք ստեղծելու, թե, բացի երեխաներից, այլ մարդիկ էլ են տոգորված ապահով Հայաստանի հեռանկարներով:

Իմիջիայլոց,  «Ապահով Հայաստան»  կարգախոսով տերև ասելիս հիշում ենք` այդ թխկու տերևը Կանադայի խորհրդանիշը չէ՞... Չենք ուզում հանրապետականներից հարցնել, մեկ էլ տեսար ասացին մեր` հայկական սոսու, չինարի  տերևն ենք վերցրել: Ախր նման են իրար...