Բարկացել էի, որովհետև դռները փակել էին ժողովրդի առջև

Տեղեկացրել էինք, որ այսօր Գյումրի է այցելել Քիմ Քարդաշյանը: Քարդաշյանն այցելել է Գյումրիի Սուրբ Յոթ վերք եկեղեցի, որտեղ, սակայն, միջադեպ է տեղի ունեցել:

Yerkir.am-ի հետ զրույցում Շիրակի թեմի առաջնորդ գերաշնորհ Տ. Միքայել արքեպիսկոպոս Աջապահյանը նշեց, որ Քարդաշյանների անվտանգության աշխատակիցները փակել էին եկեղեցու դռները՝ թույլ չտալով լրագրողներին և ժողովրդին ներս մտնել:

«Ես էլ բարկացա ու կարգադրեցի բացել դռները: Ինձ, ճիշտ է, զգուշացրել էին, որ այդ աղջիկն այցելելու է, և ես էլ ասել էի` խնդիր չկա, թող գա, եկեղեցու դռները բոլորի առջև բաց են, ներառյալ` նաև այդպիսի մարդկանց: Երբ այդպիսի մարդ մտնում է եկեղեցի, ոչ մեկին եկեղեցու դռները փակելու իրավունք չի տրված, բացի տեղի առաջնորդից: Հասկանո՞ւմ եք, ոստիկանությունն իրավունք չունի եկեղեցու դռները փակելու որևէ մեկի առջև»,-ասաց սրբազանը:

Նա նշեց նաև, որ իր խնդիրը Քարդաշյանի հետ չի եղել, այլ ոստիկանների:«Գյումրիում, ով էլ եկել է եկեղեցի, երբեք եկեղեցու դռները չեն փակվել: Այդպիսի բան Գյումրիում չի եղել և չի էլ լինելու երբեք»,- ասաց սրբազանը:

Ի դեպ, միջադեպից հետո Քարդաշյանը հեռացել է եկեղեցուց: