Պետք է սովորեն բեռ տանել. Գալուստ Սահակյանը՝ երիտասարդ ՀՀԿ-ականների մասին

Դավիթ Հարությունյանը Ստրասբուրգում է:

«Դավիթ Հարությունյանը սանատորիա չի գնացել, աշխատանքային գործուղման է»,- Yerkir.am-ի եւ haynews.am-ի թղթակցիների հետ զրույցում հայտարարեց Գալուստ Սահակյանը: Նա չհամաձայնեց մեր այն դիտարկմանը, որ տպավորություն էր, թե Դավիթ Հարությունյանը էթիկայի հանձնաժողովի հարցի վերաբերյալ քննարկումը թողել էր Արփինե Հովհաննիսյանի վրա ու գնացել: Սահակյանը հայտարարեց, որ եթե անգամ Դավիթ Հարությունյանն այստեղ լիներ, միեւնույն է, հիմնական զեկուցողը լինելու էր Արփինե Հովհաննիսյանը:

«Բոլոր երիտասարդներն էլ առաջին անգամը սկսել են նույն ձեւով, պետք է սովորեն բեռ տանել, դա կնպաստի, քաղաքական գործչի թիկնոցը ավելի արագորեն կրելու գործընթացին»,- հայտարարեց նա:

ԱԺ ՀՀԿ խմբակցության ղեկավարը վստահ է, որ Արփինե Հովհաննիսյանն իր առջեւ դրված փորձությունը լավ կատարեց: Դիտարկմանը, թե ինչու վրդովվեց Հովիկ Աբրահամյանը, Սահակյանն արձագանքեց. «Եթե Հովիկ Աբրահամյանը չմիջամտեր, ես իմ սատիրայով ավելի ուժեղ խոսքեր կասեի, որովհետեւ` ում ինչ գործն է` ով է զեկուցողը, որտեղ է Դավիթ Հարությունյանը...Դավիթ Հարությունյանը ու մեր Արփինեն ընդամենը կատարում են խմբակցության որոշումը»: