WikiLeaks.Ամերիկացիները լավ են ճանաչում իրենց հաճախորդներին

WikiLeaks-ը հրապարակել է Հայաստանում ԱՄՆ դեսպան Մարի Յովանովիչի նամակը, որում ներկայացված է դեսպանի զրույցը ՀԱԿ նախագահ Լևոն Տեր-Պետրոսյանի հետ:

Ապրիլի 22-ին Տեր-Պետրոսյանի հետ հանդիպման ժամանակ դեսպան Մարի Յովանովիչը 2 հիմնական միտք է հայտնել նախկին նախագահին.

ա) ԼՏՊ-ն պետք է գործի որպես հայրենասեր և չպետք է խափանի հայ-թուրքական հարաբերություններում առկա առաջընթացը կարճաժամկետ քաղաքական նպատակների համար,

բ) պարտադրել ԼՏՊ-ին մասնակցել Երևանի ավագանու ընտրություններին, անել ամեն ինչ խուսափելու համար 2008-ի մարտի 1-ի դեպքերի կրկնությունից:

Համաձայն նամակի` ապրիլի 22-ին Տեր-Պետրոսյանի հետ զրույցում Յովանովիչն ընդգծել է հայ-թուրքական հարաբերությունների կարգավորման հատուկ կարևորությունը և հիմնավորել է, թե ինչու ԼՏՊ-ն պետք է խուսափի զանազան սադրիչ գործողություններից և ներքաղաքական իրավիճակի ապակայունացումից, քանի որ օրակարգում Հայաստանի Հանրապետության ազգային շահերն են:

Ի պատասխան` ԼՏՊ-ն նշել է, որ միշտ կողմ է եղել հայ-թուրքական հարաբերությունների կարգավորմանը: Նա ասել է, որ իր կարծիքով` հայ-թուրքական հարաբերությունների կարգավորման համար պետք է մի կողմ դնել Ցեղասպանության ճանաչման խնդիրը: «Դա սփյուռքի գործն է և ոչ թե` մեր»,- ասել է ԼՏՊ-ն ու նշել, որ սխալ է համարում ՀՀ երկրորդ նախագահ Ռոբերտ Քոչարյանի կողմից Ցեղասպանության ճանաչման հարցը ՀՀ արտաքին քաղաքականության օրակարգ մտցնելը:

Լ. Տեր-Պետրոսյանն ասել է, թե ինքն իշխանությունների հետ բանակցելու երկու խողովակ ունի` մեկն իշխանության ներկայացուցիչների հետ անմիջական շփումը, մյուսը` Եվրոպայի միջնորդների օժանդակությամբ:

ԼՏՊ-ի հետ հանդիպման ժամանակ դեսպան Յովանովիչը երկու հիմնական «մեսիջ» է հաղորդել վերջինիս.

1. ԼՏՊ-ն պետք է հրաժարվի հայ-թուրքական հարաբերությունների կարգավորման գործընթացի սաբոտաժից, քանի որ դա չի համապատասխանում Հայաստանի երկարաժամկետ ազգային շահերին:

2. Յովանովիչը նշել է, որ մարտի 1-2 կատարվածը երկու կողմերի (իշխանություն-ընդդիմություն) սխալների արդյունքն էր, և որ ԼՏՊ-ն պետք է անի ամեն ինչ նմանատիպ սադրիչ քայլերից խուսափելու համար: Դեսպանը նկատել է, որ ցանկացած երկրում նմանատիպ իրավիճակի շտկման հիմնական ծանրությունն ընկնում է իշխանության ուսերին, սակայն ընդդիմությունը նույնպես մեծ աշխատանք ունի կատարելու:

Նամակում նշվում է, որ ՀԱԿ համակարգող Լևոն Զուրաբյանի հետ խոսակցության ժամանակ դեսպանատան ներկայացուցիչն ասել է վերջինիս, որ ՀԱԿ-ը չպետք է ներքին քաղաքական խոչընդոտներ ստեղծի Շվեյցարիայում հայ-թուրքական հարաբերությունների կարգավորման վերաբերյալ ճանապարհային քարտեզի ստորագրման համար: Անդրադառնալով 2008-ի նախագահական ընտրություններին` Յովանովիչը նշում է, որ հասարակության լայն զանգվածները երբեք էլ չեն սատարել ԼՏՊ-ին, պարզապես նա բավականին շատ «ճակատամարտեր» տեսած «պառավ աղվես» է, որն ի տարբերություն այլ ընդդիմադիր կուսակցությունների ղեկավարների կարող է դիմակայել Քոչարյան-Սարգսյան քաղաքական ուժին:

Ամփոփելով նամակը` դեսպան Յովանովիչը հույս է հայտնել, որ իրենք կկարողանան համոզել ՀԱԿ-ին ավելի զուսպ լինել իրենց գործողություններում: