Շատ լավ եմ ճանաչում Շանթ Հարությունյանին և շատ լավ եմ հասկանում նրան. Գալուստ Սահակյան

ԱԺ նախագահ Գալուստ Սահակյանը կքննարկի սահմանադրական փոփոխությունները, երբ պատրաստ կլինի բուն տեքստը: Այսօր լրագրողների հետ զրույցում, խոսելով սահմանադրական փոփոխությունների հայեցակարգի մասին, նա նշեց, որ դա դեռ հայեցակարգ է, և դեռ պետք է մշակվի բուն տեքստը: ԱԺ նախագահը հավելեց, որ այլ քաղաքական ուժերի կողմից ևս կան առաջարկություններ:

Դիտարկմանը, թե գուցե ընդդիմության ճնշման արդյունքում է, որ Սերժ Սարգսյանը հետաձգել է սահմանադրական բարեփոխումների հայեցակարգի վերաբերյալ վերջնական դիրքորոշում արտահայտելը, Սահակյանը պատասխանեց. «Ժողովուրդն այդքան լավ չգիտի` Սահմանադրությունն ինչպես է շրջանառության մեջ դրվում: Մենք մարզային քննարկումներ կատարեցինք, դրանից հետո ներկայացվեց Վենետիկի հանձնաժողովին: Հիմա լրացուցիչ քննարկման փուլ է անցնում, դրանից հետո տեքստը կհրապարակվի: Դե, ընդդիմությունը միշտ մտածում է, որ իրենցից վախենում են»:

Հարցին` Շանթ Հարությունյանին քաղբանտարկյալ համարո՞ւմ է, ԱԺ նախագահը պատասխանեց, որ Հայաստանում երբեք քաղբանտարկյալներ չեն լինի:

«Իմ քաղաքական ըմբռնումների վրա մեծ ազդեցություն են ունեցել քաղբանտարկյալները: Այդ թիկնոցը մեր ժամանակների թիկնոցը չէ: Քաղբանտարկյալները նրանք են, ովքեր ընդհատակյա գործողություններ էին ծավալում, իսկ եթե բացեիբաց ով ինչ ուզում, խոսում է, այդ թվում` Շանթ Հարությունյանը... Ես ինքս շատ լավ եմ ճանաչում նրան և շատ լավ եմ հասկանում նրան և ցավում եմ տեղի ունեցածի համար: Փորձությունների, խոչընդոտների և ամեն ինչի ճանապարհը քաղբանտարկյալ լինելն է»,- ասաց Գալուստ Սահակյանը: