Շեւարդնաձեն հերքել է հայկական լոբբիի դավադրության փաստը

Լիակատար անհեթեթություն. այսպես է որակել Վրաստանի նախկին նախագահ Էդուարդ Շեւարդնաձեն այն խոսակցությունները, թե ինքը իշխանությունը 2003-ին Միխեիլ Սահակաշվիլիին է հանձնել հայկական լոբբիի հետ դավադրության արդյունքում:

«Դա, իհարկե, հիմարություն է»,- «Ասավալ-Դասավալի» շաբաթաթերթին տված հարցազրույցում ասել է նա:

Միաժամանակ, Շեւարդնաձեն համաձայնել է այն դիրքորոշման հետ, թե Վրաստանի հանգստավայրերում «տիրում» են հայերն ու թուրքերը: «Ցավոք, մեր պետությունն այսօր տեր չունի, եւ սատանաները գրավել են անտեր եկեղեցին, կամ համարյա գրավել են»,- նշել է նա:

Վրաստանի նախկին նախագահը նաեւ հայտարարել է, որ չի կարող հաստատել, որ Սահակաշվիլին հովանավորում է հայկական լոբբիին: «Ես կարող եմ միայն մի բան ասել, որ մեր համագործակցությունը Հայաստանի եւ Ադրբեջանի հետ կառուցված էր իսկական բարեկամության եւ բարիդրացիության վրա, եւ իմ անձնական ընկերներն էին Հեյդար Ալիեւն ու Կարեն Դեմիրճյանը»,- ընդգծել է նա: