Շեւարդնաձեն հավանում է Պուտինին

Անհիմն են այն խոսքերը, թե Ռուսաստանի ներկայիս վարչապետ Վլադիմիր Պուտինի վերադարձը նախագահի պաշտոնին աղետ կլինի Վրաստանի համար. լրագրողների հետ հանդիպման ժամանակ ասել է Վրաստանի նախկին նախագահ Էդուարդ Շևարդնաձեն։

«Ես Պուտինին ճանաչում եմ համարյա նրա մանկությունից: Նա վրացիներին չի ատում»,- ասել է նախկին նախագահը:

Նա նաեւ կարծիք է հայտնել, որ ցանկության դեպքում Վրաստանի ղեկավարությունը կկարողանա ընդհանուր լեզու գտնել Ռուսաստանի հետ, նաեւ` երբ  Պուտինը նախագահ դառնա։

«Ռուսաստանը մեր մեծ հարեւանն է։ Ռուսաստանի ինչի՞ն է պետք Վրաստանի օկուպացումը: Ռուսաստանն առանց այդ էլ ամուր արմատներ է գցել մեր տնտեսության մեջ. ռազմավարական նշանակության օբյեկտների մեծ մասը նրա ձեռքում է։ Նա ճանաչել է Աբխազիայի եւ Հարավային Օսիայի անկախությունը, այնպես որ` նա Վրաստանն օկուպացնելու պատճառ չունի»,- հայտարարել է Շեւարդնաձեն։