ԵՄ-ն այլընտրանքային ծրագիր է պատրաստում Հունաստանի համար

Գաղտնիության մթնոլորտում Եվրամիությունն այլընտրանքային ծրագիր է պատրաստում Հունաստանի համար, եթե եվրոյի գոտու այդ երկրի խորհրդարանը չորեքշաբթի օրը չընդունի պետական սեփականության սեփականաշնորհման եւ կոշտ տնտեսվարման նոր ծրագիրը:

Ինչպես տեղեկացնում է Financial Times բրիտանական թերթը, նախաձեռնողը Գերմանիան է, որին մտահոգում է եվրոյի գոտում համակարգային ճգնաժամի առաջացումը, եթե Հունաստանի իրադարձությունները դուրս գան կառավարության վերահսկողությունից:

Եթե Հունաստանի խորհրդարանը հաստատի 28 մլրդ եվրոյի տնտեսման նոր ծրագիրը, Աթենքը 12 մլրդ եվրոյի տրանշ կստանա ԵՄ համատեղ վարկային գծից եւ Արժույթի միջազգային հիմնադրամից: Իսկ եթե Պապանդրեուի կառավարությունը չկարողանա համոզել պատգամավորներին, ԱՄՀ-ի պահանջով տրանշի վճարումը կհետաձգվի, եւ Հունաստանն արդեն հաջորդ ամսվա կեսին ի վիճակի չի լինի ֆինանսավորել իր պետբյուջեն:

ԵՄ-ի մշակած այլընտրանքային ծրագրով նախատեսվում է չթույլատրել Հունաստանի դեֆոլտը: Լոնդոնյան գործարար շրջանակների տեղեկություններով` Եվրամիությունը եւ Եվրոպական կենտրոնական բնակը հնարավոր է` առանց ԱՄՀ-ի, վարկ տրամադրեն Հունաստանին, որպեսզի խուսափեն անկառավարելի դեֆոլտից եւ եվրոյի գոտում ֆինանսական քաոսից:

Ի դեպ, այսօր առավոտից Հունաստանում 48 ժամանոց հանընդհանուր գործադուլ է հայտարարվել: Պետական ծառայողները եւ մասնավոր հատվածի աշխատակիցները բողոքում են 28 մլրդ եվրոյի տնտեսման ծրագրի դեմ: