Համշենահայերը վրդովված են Անդրանիկի արձանի ապամոնտաժումից

Ռուսաստանի հայերի միության Սոչիի մասնաճյուղի կողմից Անդրանիկ Օզանյանի` Սոչիում կանգնեցված հուշարձանի ապամոնտաժումը վրդովեցրել է Ռուսաստանում եւ աշխարհի այլ երկրներում բնակվող հարյուրհազարավոր համշենահայերի. տեղեկացնում է «Երկրամասը»:

«Անդրանիկ Օզանյանը մեզ համար ոչ միայն ազգային հերոս է եւ ժողովրդի ազատության համար պայքարած մարտիկ, նա նաեւ մեր համերկրացին է` Օսմանյան Թուրքիայի Տրաբզոն վիլայեթից, որտեղից սերել են ներկայումս Սոչիում ապրող բազմաթիվ համշենահայեր»,- ասվում է Կրասնոդարի «Համշեն» կենտրոնի եւ Մոսկվայի համշենահայերի միության հայտարարության մեջ:

Նամակագիրները նշում են, որ Ռուսաստանի համշենահայերը այդ իրողությունը համարում են վանդալիզմ, որը կարող է տարածաշրջաում հասարակական անդորրը ապակայունացնող գործոն դառնալ:

Ի դեպ, մինչ օրս ոչ մի հստակ, գիտակից պատասխան չի տրվել, թե ինչու է ապամոնտաժվում հայ ժողովրդի ազգային հերոս, ռուսական բանակի գեներալի հուշարձանը, ընդ որում` մի կազմակերպության կողմից, որն այն տեղադրելու նախաձեռնությանը չի էլ մասնակցել:

Ռուսաստանի հայերի միության նախագահ Արա Աբրահամյանի վերջին հայտարարությունները հաշվի առնելով` նամակի հեղինակները հույս են հայտնում, որ նա միջոցներ կձեռնարկի արդարությունը վերականգնելու ուղղությամբ, այն է` հուշարձանը կտեղադրվի նախկին տեղում, իսկ մեղավորները կպատժվեն: