Զորավար Անդրանիկի ձեռագրերը վերջապես կհանձնվեն Հայաստանի պատմության թանգարանին

Ապրիլի 22-ին Հայաստանի պատմության թանգարանում տեղի կունենա հայ ազատագրական շարժման խորհրդանիշերից մեկի՝ Անդրանիկ Օզանյանի ձեռագրերի բնօրինակների հանձնման հանդիսավոր արարողությունը: Ձեռագրերը թանգարանին կհանձնի բրիտանահայ դոկտոր Հրաչ Կույումջյանը:

Անդրանիկ Օզանյանը 1921թ. 65 էջից բաղկացած ձեռագրերը տպագրության համար ուղարկել է Փարիզի «Ապագա» ամսագրի գլխավոր խմբագիր Հովհաննես Պողոսյանին: 1960-ական թթ. Պողոսյանը ձեռագրերը հանձնել է Համբարձում Կույումջյանին՝ հնարավորության դեպքում Հայաստանին փոխանցելու համար: 1988-ին` մահվանից երեք տարի առաջ, Կույումջյանը ձեռագրերը փոխանցել է որդուն` Հրաչ Կույումջյանը: Զորավարի ձեռագրերը Միացյալ Թագավորությունից տեղափոխվել են Ֆրանսիա, այնուհետև` Լիբանան, Հունաստան և կրկին վերադարձվել Անգլիա:

Պայմանավորվածություն է ձեռք բերվել ձեռագրերը կրկնօրինակելու և Չարենցի անվան գրականության և արվեստի թանգարանին ու Հայաստանի ազգային արխիվին ի պահ հանձնելու շուրջ: