Վառնայում կանգնեցվել է Անդրանիկի արձանը (տեսանյութ)

Բուլղարական Վառնա քաղաքի Գալաթա շրջանում հավաքված հարյուրավոր մարդիկ հարգել են Բուլղարիայի, Հայաստանի եւ Ռուսաստանի ազգային հերոս, գեներալ Անդրանիկ Օզանյանի հիշատակը:

Ինչպես տեղեկացնում է «Երկրամասը», Անդրանիկի 6 մետրանոց հուշարձանը կանգնեցվել է քաղաքի հրապարակներից մեկում, որը կրելու է նրա անունը:

Հուշարձանի բացման հանդիսավոր արարողությանը մասնակցել են Բուլղարիայի քաղաքական եւ հասարակական գործիչներ, Բուլղարիայի հայերի միության ներկայացուցիչները, նաեւ Անդրանիկի թոռը` Վարդան Նռանյանը:

Գեներալին նվիրված հուշարձանի բացումն առաջին միջոցառումն է Բալկանյան պատերազմի 100-րդ տարելիցին նվիրված շարքում:

Անդրանիկին հուշարձանի կանգնեցման` բուլղարական իշխանությունների նախաձեռնությունը, ինչպես միշտ, առաջացրել է Թուրքիայի դժգոհությունը, որը պաշտոնապես բողոք է ներկայացրել: Սակայն Բուլղարիան չի ենթարկվել թուրքական շանտաժին, ի տարբերություն Ռուսաստանի, որտեղ իշխանությունների ճնշման տակ ապամոնտաժվեց հերոսի` Սոչիում կանգնեցված արձանը: Քաղաքի իշխանությունները պատճառաբանել էին, թե Թուրքիան սպառնում է խոչընդոտել Սոչիում անցկացվելիք օլիմպիական խաղերին: