Քադաֆիի որդին անցել է ընդդիմության կողմը

Լիբիայի առաջնորդ Մուամար Քադաֆիի վեց որդիներից մեկը` Սաիֆ ալ Արաբը, միացել է ընդդիմադիրներին. հաղորդում է Իրանի PressTV հեռուստաալիքը:

Սաիֆը, որին հայրը հանձնարարել էր ապահովել ուժային կառույցների լոյալությունը եւ թույլ չտալ դրանց անցումը ընդդիմության կողմը, փետրվարի 24-ին միացել է Բենգազիի բողոքի ակցիայի մասնակիցներին:

Սաիֆը հասկացրել է, որ հայրը, իշխանությունից հեռացվելու դեպքում, դիտարկում է ինքնասպանության կամ Հարավային Ամերիկա փախչելու հնարավորությունները:

Ընդդիմությունը, որի կողմն է անցել բանակի մի քանի ստորաբաժանում, վերահսկում է երկրի զգալի մասը: Քադաֆիի կողմնակիցների եւ հակառակորդների միջեւ տեղի ունեցած բախումների հետեւանքով, ինչպես նաեւ իշխանությունների կողմից ընդդիմության ակցիաների ճնշման ժամանակ, իրավապաշտպան կազմակերպությունների տվյալներով, զոհվել է մինչեւ 2000 մարդ: