Քադաֆիի կոչը` "բարբարոսներին"

Լիբիայի առաջնորդ Մուամար Քադաֆին դիմել է միջազգային հանրությանը եւ կոչ արել դադարեցնել ռազմական գործողություններն իր երկրում: Միջազգային կոալիցայի երկրների ղեկավարներին ուղղված նամակում նա այդ ամենն անվանել է «բարբարոսական հարձակումներ». տեղեկացնում է Lenta.ru-ն:

Այսօր Լոնդոնում Լիբիայի խնդրի վերաբերյալ գագաթաժողով է կազմակերպվել: Մասնակից երկրների թիվը 35-ն է, այդ թվում` 7 արաբական պետություններ: Անդրադառնալով այդ գագաթաժողովին` Քադաֆին ՆԱՏՕ-ի օդային ռմբակոծությունները համեմատել է Երկրորդ համաշխարհային պատերազմի ժամանակ Հիտլերի գործողությունների հետ:

Լիբիայում ռազմական գործողությունները սկսվել են մարտի 19-ից: Մյուս պետությունների` երկրի ներքին խնդիրներին միջամտելու թույլտվությունը տրվել է ՄԱԿ-ի Անվտանգության խորհրդի որոշմամբ:

Ռմբակոծությունների առաջին փուլն իրականացրել է միջազգային կոալիցիան` ի դեմս ԱՄՆ-ի, Մեծ Բրիտանիայի, Ֆրանսիայի եւ այլ երկրների: Մարտի 27-ից գործողությունները ղեկավարում է ՆԱՏՕ-ն: