Քադաֆիի բախտին չի արժանանա

Սաուդյան Արաբիայի թագավոր Աբդալլահ իբն Աբդել Ազիզ աս Սաուդը ժողովրդի կենսամակարդակը բարձրացնելու համար հատկացրել է 36 միլիարդ դոլար. գրում է Financial Times-ը:

Փորձագետները կարծում են, թե այդպիսով միապետը փորձում է զսպել հնարավոր հակաիշխանական ակցիաները, որոնք սկսվել են արաբական աշխարհի մի շարք երկրներում, այդ թվում`Սաուդյան Արաբիայի հարեւան Բահրեյնում:

Թագավորը հայտարարել է, որ պետական կառույցների աշխատակիցների աշխատավարձը բարձրացվելու է 15 տոկոսով, հատկացված 36 միլիարդի մի մասն էլ տրվելու է գործազուրկներին եւ ուսանողներին: Բացի այս` Աբդալլահը որոշել է մեղմել պարտքերի դիմաց պատիժների կիրառման համակարգը:

Նա ֆինանսական այս հատկացումների մասին հայտարարել ԱՄՆ-ից վերադառնալուց հետո իր առաջին հանրային ելույթում: Նահանգներում թագավորը եռամսյա բուժում է ստացել. անցյալ տարի վիրահատվել էր նրա ողնաշարը: