Քադաֆիի որդին պատրաստվում է առաջադրվել Լիբիայի նախագահի պաշտոնում. Times

Լիբիայի գահընկեց արված առաջնորդ Մուամար Քադաֆիի որդին՝ Սեյֆ ալ Իսլամը, պատրաստվում է վերադառնալ քաղաքականություն և առաջադրվել Լիբիայի նախագահի պաշտոնում. գրում է The Times-ը:

Ըստ բրիտանական թերթի՝ նրան նախկինում տեսնում էին որպես Քադաֆիի իրավահաջորդ, բայց տասը տարի առաջ` «արաբական գարնանից» հետո, նրան գերեցին Լիբիայի անապատում, և այդ ժամանակվանից նա այլևս չի հայտնվում հասարակության առջև: Սեյֆ ալ Իսլամը բանտարկվել է, ցմահ ազատազրկման ենթարկվել, բայց հետո ազատ արձակվել: Իսկ Լիբիայում և Միջազգային քրեական դատարանում նրա դեմ մեղադրանք էր առաջադրվել: Նրան ճանաչողներն ասում են, որ Սեյֆը կարող է առաջադրվել՝ առանց ուշադրություն դարձնելու այդ դատական գործերին:

Լիբիայում ընտրությունները նշանակված են դեկտեմբերի 24-ին, բայց Քադաֆիի թեկնածության մասին ցանկանում են հայտարարել ավելի ուշ` երբ ընտրությունների մասին օրենքն արդեն ընդունվի: Հակառակ դեպքում` հակառակորդները կարող են խանգարել: Օրինակ` ներկայացնել դրույթ, ըստ որի` նախագահը կնշանակվի խորհրդարանի կողմից:

Ըստ Times-ի` Քադաֆին կարող է բախվել կյանքի սպառնալիքի. ԶԼՄ-ները հայտնում են, որ նրա հակառակորդ, գեներալ Հաֆթարը, որը նույնպես նախագահ դառնալու հավակնություններ ունի, ցանկանում է սպանել նրան: