Պարզում են ձվի դեֆիցիտի պատճառները

Այն, որ ձվի դեֆիցիտ եղել է նախատոնական օրերին, ֆիքսել է նաեւ տնտեսական մրցակցության պաշտպանության պետական հանձնաժողովը (ՏՄՊՊՀ): Իսկ թե դեֆիցիտը եղել է արհեստական, թե բնական, դեռեւս պարզ չէ: Հանձնաժողովը հենց դա պարզելու ուղղությամբ է աշխատում:

Եթե պարզվի, որ դեֆիցիտը  պայմանավորված է եղել շուկայի պահանջով, օրինակ, եթե պարզապես ձվի պահանջարկն է ավելի մեծ եղել, ապա այդ դեպքում հանձնաժողովը որեւէ անելիք չի ունենա:

«Իսկ եթե դեֆիցիտը արհեստական է եղել, ապա պետք պարզվի, թե ինչ գործոններով է այն պայմանավորված եղել»,- «Երկիր»-ի հետ զրույցում ասաց ՏՄՊՊՀ նախագահի գլխավոր խորհրդական Արամ Սահակյանը:

Ներկայումս հանձնաժողովը տեղեկություններ է հավաքում: Ա. Սահակյանի խոսքերով` տեղեկությունները ստանում են տարբեր աղբյուրներից եւ տարբեր ժամկետներում. այս է պատճառով չեն կարող ասել, թե ուսումնասիրության արդյունքները երբ հայտնի կդառնան:

Նա նշեց նաեւ, որ այս խնդիրն իրենց նույնպես մտահոգում է, որովհետեւ նախորդ տարվա վերջին գրեթե միակ թանկացած ապրանքը եղել է ձուն:

Մյուս ապրանքների գները համեմատաբար ավելի կայուն են եղել, որոշ դեպքերում նույնիսկ ապրանքը բավականին էժան է վաճառվել: Խոսքը սուպերմարկետներում անցկացված ակցիաների մասին է: