ԵԱՏՄ-ում քննարկվել է միասնական տրանսպորտային տարածքի ձևավորման հարցը

Եվրասիական տնտեսական միության (ԵԱՏՄ) անդամ պետությունների տրանսպորտի ոլորտի լիազոր մարմինների ղեկավարների խորհրդի 11-րդ նիստում քննարկվել են միության տրանսպորտային քաղաքականության իրականացմանն ուղղված հարցեր։

Նիստի ընթացքում անդրադարձ է կատարվել 2027-2029 թվականների համար տրանսպորտային քաղաքականության իրականացման ճանապարհային քարտեզի նախագծի նախապատրաստման ընթացքին։

Քննարկվել են նաև միջազգային բեռնափոխադրումներ իրականացնող վարորդների աշխատանքի և հանգստի ռեժիմի վերահսկման համաձայնեցված մեխանիզմի, միության արտաքին սահմանին տրանսպորտային վերահսկողության տեղեկատվական ապահովման, ինչպես նաև միջազգային բեռնափոխադրումներում էլեկտրոնային՝ e-CMR բեռնագրերի կիրառման փորձնական ծրագրի իրականացման ընթացքը։

Նիստի մասնակիցները հավանություն են տվել «Արևելք-Արևմուտք» և «Հյուսիս-Հարավ» ուղղություններով տրանսպորտային ենթակառուցվածքների խնդրահարույց հատվածների ցանկին։

Որոշում է ընդունվել նաև համակարգված աշխատանքներ իրականացնել ավիացիոն պատահարների վերաբերյալ միասնական ինտեգրված տեղեկատվական բազայի ստեղծման ուղղությամբ՝ թռիչքների անվտանգության կառավարման համակարգերի համար՝ հաշվի առնելով Միջպետական ավիացիոն կոմիտեի (ՄԱԿ) գործունեությունը։