ՌԴ ներկայացուցիչը քննադատության է ենթարկել Սիրիայի նոր իշխանություններին

ՄԱԿ-ում ՌԴ ներկայացուցիչ Վասիլի Նեբենզյան փակ քննարկման ժամանակ սուր քննադատության է ենթարկել Սիրիայի նոր ղեկավարությանը։Այս մասին հայտնում է Reuters-ը՝ վկայակոչելով իրազեկ աղբյուրների։

«Մոսկվան նախազգուշացրել է Սիրիայում ջիհադիստների աճի մասին և կրոնական հիմքերով ալավիների զանգվածային սպանությունները համեմատել է 1994 թվականին Ռուանդայի ցեղասպանության հետ», - նշված է հոդվածում։

Նեբենզյան հանդիպման մասնակիցներին ասել է, որ Սիրիայում սպանությունները ոչ ոք չի դադարեցրել։

Նեբենզյան քննադատել է նոր իսլամիստ կառավարիչների կողմից Սիրիայի բանակի լուծարումը և հասարակական աշխատուժի զանգվածային կրճատումները՝ զգուշացնելով, որ «իրաքյան սցենարը» կարող է նորից կրկնվել՝ նկատի ունենալով Սադամ Հուսեյնի իշխանության տապալումը և Իրաքի պետական ​​կառույցների ապամոնտաժմանը հաջորդած բռնությունները:

Պաշտոնյան նաև մտահոգություն է հայտնել, որ օտարերկրյա ահաբեկիչ մարտիկները կործանարար դեր են խաղում Սիրիայում։

ԱՄՆ-ի, Ֆրանսիայի և Չինաստանի բանագնացները նույնպես փակ ճեպազրույցում ընդգծել են իրենց անհանգստությունը Սիրիայում օտարերկրյա զինյալների առկայության և երկրի քաղաքական անցման գործընթացի կապակցությամբ։

Հարկ է նշել, որ Ռուսաստանն ակտիվորեն բանակցում է Սիրիայի նոր իշխանությունների հետ՝ երկրի տարածքում իր ռազմակայանների պահպանման վերաբերյալ։