Տեղյակ չեմ, որ իմ նոր օգնական Տիգրան Մուղնեցյանի նշանակումը քննադատության է արժանացել. Էդուարդ Աղաջանյան

Տեղյակ չեմ, որ իմ նոր օգնական Տիգրան Մուղնեցյանի նշանակումը քննադատության է արժանացել. խորհրդարանում լրագրողների հետ զրույցում հայտարարեց ՀՀ վարչապետի աշխատակազմի ղեկավար Էդուարդ Աղաջանյանը: «Նման հրապարակումների չեմ հանդիպել։ Տիգրան Մուղնեցյանը բազմատաղանդ, խելացի երիտասարդ է»,- ասաց նա:

Հարցին՝ արդյո՞ք Մուղնեցյանը ծառայել է, թե՞ ոչ, Ավինյանը պատասխանեց. «Տեղյակ չեմ, անկեղծ ասած, պետք է հարցնեմ։ Իմ իմանալով՝ չէ»։

Նշենք, որ իր օգնականի մասին Աղաջանյանը ֆեյսբուքյան էջում գրել էր. «Պատիվ ունեմ Ձեր ուշադրությանը ներկայացնել իմ առաջին նշանակմանը՝ Մուղնեցյան Տիգրանին: Տիգրանն իմ օգնականն է: Վաղեմի ընդդիմադիր ակտիվիստ, ՔՊ համախոհ և մեր թիմի լավ ընկեր, չնայած որ ընդամենը 21 տարեկան է: Դպրոցական տարիներին մասնակցել և հաղթել է տարբեր օլիմպիադաներում: 11 տարեկանից մասնակցում է ինտելեկտուալ հեռուստածրագիր՝ «Что? Где? Когда?»-ին և աչքի է ընկել իր պայծառ մտքով: 18 տարեկանում «Ո՞վ է ուզում դառնալ միլիոնատեր» հեռուստաշուին հասել է 250 000 ՀՀԴ շեմին և, սթափ գնահատելով պահի լրջությունը՝ որոշել է կանգ առնել այդ կետի վրա»։

Հարցին էլ՝ կառավարության աշխատակազմում այս տարիներին մի շարք չարաշահումներ են եղել, ինչպե՞ս է նոր կառավարությունը դրանց դեմ պայքարելու, Աղաջանյանն արձագանքեց, որ իրենք չեն կրճատելու մարդկային ռեսուրսը, այլ ավտոմեքենաների և դիզվառելիքի կտրոնի տրամադրումը։

«Կառավարության աշխատակազմի ենթակայության տակ մոտ 110 մեքենա է, ու մեր նախնական հաշվարկներով` մոտ 30 տոկոսը ենթակա է կրճատման»,- նշեց նա։