Մերկելը Մոսկվայում խիստ քննադատության է ենթարկել Պուտինին

Գերմանիայի կանցլեր Անգելա Մերկելը մայիսի 10-ին ժամանել է Մոսկվա:  ՌԴ նախագահ Վլադիմիր Պուտինի հետ նա ծաղկեպսակ է դրել Անհայտ զինվորի գերեզմանին, այնուհետև բանակցություններ վարել, որոնց ավարտից հետո կայացել է համատեղ մամուլի ասուլիս. հայտնում է ВВС-ի ռուսական ծառայությունը:

Մերկելը, Պուտինի կողքին կանգնած, խիստ քննադատության է ենթարկել ռուսական ղեկավարության քաղաքականությունը: Նա դարձյալ խոսել է Ղրիմի անեքսիայից՝ նշելով, որ Մոսկվայի գործողությունները հետ են գցել ՌԴ-ի և Արևմուտքի հարաբերությունները: «Ղրիմի հանցավոր անեքսիան, որը խախտում է միջազգային իրավունքը, և Ուկրաինայի արևելքում հակամարտությունը լրջորեն վնասել են մեր հարաբերությունները»,- ասել է նա:

Մերկելը նաև նշել է, որ  խաղաղությունը Ուկրաինայի արևելքում այդպես էլ չի հաստատվել անջատողականների կողմից խախտումների պատճառով:

Պուտինն, իր հերթին, նշել է, որ հրադադարի ռեժիմի խախտման համար պատասխանատու են երկու կողմերը, և կոչ է արել Կիևին` ուղիղ երկխոսություն սկսել Դոնեցկի և Լուգանսկի հետ: Ղրիմի մասին նա չի խոսել: