Սիրիայի նոր կառավարիչները հանդիպել են քրիստոնյա ու հայ համայնքների ներկայացուցիչների հետ, տվել անվտանգային երաշխիքներ

Սիրիայի կառավարման նոր պատասխանատուները հանդիպում են ունեցել Սիրիայի քրիստոնյա և հայ համայնքի ներկայացուցիչների հետ։ Այդ մասին «Փաստինֆո»-ին փոխանցեց Հալեպում հրապարակվող հայկական «Գանձասար» պարբերականի խմբագիր Զարմիկ Պողիկյանը։

Նրա փոխանցմամբ՝ հանդիպումը լավ, դրական մթնոլորտում է ընթացել, նոր կառավարիչների ներկայացուցիչներն ասել են, որ աստիճանաբար պետք է վերագործարկվեն համագործակցության մեխանիզմները, վստահեցրել, որ հարգում են քրիստոնյաների կրոնական առանձնահատկությունները։

Քրիստոնյա և հայ առաջնորդներն ավելացրել են , որ պատրաստ են համագործակցել հանուն Սիրկայի բարելավման, հանուն Սիրիայի ապագայի։ «Տակավին ժամանակ է պետք, որպեսզի մարդիկ հասկանան,թե ինչպես է կառավարությունը գործելու և գործադիր մարմինը պետք է ճշտվի, որպեսզի պետական մարմիններն ամբողջությամբ գործեն և կայնքն ավելի կառավարելի դառնա, բայց, այս պահի դրությամբ, ապահով ենք, զինյալ ներկայություն չկա, մարդիկ փողոցներում հանգիստ շրջում են, հիմա հայ համայնքի համար կարևորը ապահովության երաշխիքն է»,- ասաց մեր զրուցակիցը՝ ավելացնելով, որ Սիրկայի հայ համայնքը տարիների փորձառություն ունի երկրի տարբեր իշխանությունների հետ գործելու։

«Տևական ներկայություն ունենք Սիրիայում, համայնքն ունի փորձառություն, ձեռք- ձեռքի տալով, տարբեր իշխանությունների հետ հանուն Սիրիայի պետության պահպանման աշխատելու, մեզ համար կարևոր է, որ պահպանված լինեն համայնքի իրավունքներն ու ապահովությունը, հարգեն հայերի կրոնական ու ազգային մշակութային առանձնահատկությունները», - ասաց Զարմիկ Պողիկյանը։

Ինչ վերաբերում է կենցաղային խնդիրներին, ապա Պողիկյանն ասաց, որ էլեկտրաէներգիան դեռեւս մատակարարվում է գրաֆիկով՝ օրը մի քանի ժամով, ցուրտ է, ունեն ջեռուցման խնդիր, բայց նաեւ աստիճանաբար ակտիվություն է նկատվում, մարդիկ իրենց խանութներն ու գրասենյակները սկսում են բացել։

Աղբյուր` Փաստինֆո