20 միլիոն մարդ է մահացել COVID-ից. ԱՀԿ ղեկավար

Առնվազն 20 միլիոն մարդ է մահացել COVID-19-ից 2020 թվականին համավարակի սկզբից ի վեր: Այս մասին հայտարարել է Առողջապահության համաշխարհային կազմակերպության ղեկավար Թեդրոս Ադհանոմ Հեբրեյեսուսը:

Նրա խոսքով՝ պաշտոնական տվյալներով՝ 2020 թվականից ի վեր կորոնավիրուսից մահացել է մոտ 7 մլն մարդ, սակայն իրական ցուցանիշները զգալիորեն բարձր են։

«Խոսքն առնվազն 20 միլիոն մահացածների մասին է»,-ասել է Հեբրեյեսուսը:

Ավելի վաղ ԱՀԿ-ն հայտնել է, որ ապրիլի 3-ից 30-ը աշխարհում գրեթե 2,8 միլիոն մարդ վարակվել է կորոնավիրուսով, ավելի քան 17 հազար մարդ մահացել է: Մահացությունների թիվը նախորդ չորս շաբաթների համեմատ նվազել է 30 տոկոսով։

28 օրվա ընթացքում COVID-19-ով ամենաշատ վարակվածները հայտնաբերվել են ԱՄՆ-ում՝ 392 480: Դրան հաջորդում են Հարավային Կորեան (330 509), Ճապոնիան (251 158):

Մայիսի 3-ի տվյալներով՝ ԱՀԿ-ն հաղորդումներ է ստացել համավարակի սկզբից կորոնավիրուսով 765,2 մլն վարակվածների եւ 6,9 մլն մահացածների մասին։