ԱՀԿ ղեկավարը վստահ է, որ COVID-19 համավարակը կավարտվի 2023 թվականին

Առողջապահության համաշխարհային կազմակերպության ղեկավարը նշել է համավարակից դասեր քաղելու անհրաժեշտությունը։

ԱՀԿ ղեկավար Թեդրոս Ադհանոմ Գեբրեյեսուսը հայտարարել է, որ հույս ունի, որ կորոնավիրուսային համավարակը կավարտվի 2023 թվականին։
Նրա խոսքով` կորոնավիրուսից մահացությունների շաբաթական թիվն առաջին անգամ ավելի քիչ է, քան այն թիվը, որի ժամանակ համավարակ հայտարարվեց։

«Վստահ եմ, որ այս տարվա ընթացքում ինչ-որ պահի մենք կկարողանանք ասել, որ COVID-19-ը ավարտվել է որպես միջազգային նշանակություն ունեցող հանրային առողջության ոլորտում արտակարգ իրավիճակ և որպես համավարակ»,-ասել է կազմակերպության ղեկավարը, հաղորդում է ԱՀԿ-ի կայքը:

Գեբրեյեսուսը նշել է նաև համավարակից դասեր քաղելու անհրաժեշտության մասին, որպեսզի չկրկնվի «անփութության խուճապի ցիկլը», որով երկար ժամանակ բնութագրվում էին համավարակի նկատմամբ պատասխան միջոցառումները։

Չինաստանի իշխանությունները 2019 թվականի դեկտեմբերի 31-ին ԱՀԿ-ին տեղեկացրել են երկրի կենտրոնական մասում գտնվող Ուհան քաղաքում (Հուբեյ նահանգ) անհայտ թոքաբորբի բռնկման մասին: Ընդ որում, առաջին հիվանդացածները այս կամ այն կերպ կապված էին տեղական ծովամթերքի շուկայի հետ։ 2020 թվականի հունվարի սկզբին Չինաստանում պաշտոնապես հայտարարվեց, որ անհայտ ծագման վիրուսային թոքաբորբի բռնկման պատճառ է դարձել կորոնավիրուսի նոր տեսակը։ Եվ արդեն 2020 թվականի մարտի 11-ին ԱՀԿ ղեկավար Թեդրոս Ադհանոմ Գեբրեյեսուսը հայտարարեց, որ նոր կորոնավիրուսի տարածումը համավարակի բնույթ է կրում։