Քաղաքապետարանի ձերբակալված պաշտոնյաներն ազատության մեջ են

Երևանի քաղաքապետարանի աշխատակազմի նախկին ղեկավար Սեյրան Մեջլումյանը, ճարտարապետության և քաղաաքաշինության վարչության պետի տեղակալ, վարչության պետի պաշտոնակատար Դավիթ Դալլաքյանը, որոնք ձերբակալվել են երեկ Հակակոռուպցիոն կոմիտեում քննվող քրեական վարույթի շրջանակներում, ազատ են արձակվել։

«Փաստինֆո»-ի տեղեկություններով՝ նրանք այժմ մեղադրյալի կարգավիճակ ունեն։ Ընդ որում, կալանավորելու միջնորդություն ներկայացվել էր միայն Մեջլումյանի վերաբերյալ, ինչը դատարանը մերժել է։ Նույն գործով մեղադրյալի կարգավիճակ ունի նաև քաղաքապետարանի մեկ այլ պաշտոնյա՝ ՔՊ-ական Տարոն Միրոյանը, որը երեկ բերման էր ենթարկվել և հարցաքննությունից հետո ազատ արձակվել։

Իրավապահներն առ այժմ զերծ են մնում մանրամասնելուց, թե ինչ գործով են անցնում քաղաքապետարանի պաշտոնյաները, մամուլում տեղեկություններ կան, որ խոսքը ինքնակամ շինությունների օրինականացման վերաբերյալ գործի մասին է։

Ի դեպ, Սեյրան Մեջլումյանն աշխատանքից ազատման դիմում էր ներկայացրել Հրաչյա Սարգսյանի հրաժարականի օրը: Սեյրան Մեջլումյանը քաղաքապետարանի աշխատակազմի քարտուղարի պաշտոնակատար էր նշանակվել 2022թ. հուլիսի 19-ին: