Իրանցի պաշտոնյաներն ակնարկում են` Հայաստանը չի օգտագործում Իրանի հետ համագործակցելու հնարավորությունները

Այսօր լրագրողների հետ զրույցում ՀՀ-ում Իրանի արտակարգ և լիազոր դեսպան Սեյեդ Քազեմ Սաջադին, անդրադառնալով Հայաստան-Իրան հարաբերություններին, ասել է, որ քաղաքական հարաբերությունների մակարդակը շատ բարձր է, իսկ ինչ վերաբերում է տնտեսական հարաբերություններին, ապա Հայաստանի ԵՏՄ անդամ լինելը  շատ լավ հնարավորություն է երկու երկրների միջև առևտրա-տնտեսական հարաբերությունները զարգացնելու համար:

Դեսպանի խոսքով` Իրանից գործարարները ակտիվ այցեր են կազմաակերպում Հայաստան, մինչդեռ հայ գործարարները ակտիվ չեն Իրանում, ուստի պետք է  նպաստել, որ Հայաստանից ներդրողներ ու գործարարներ գնան Իրան:

Դեսպանը կարծիք հայտնեց, որ Հայաստանը, որպես Իրանի հարևան երկիր, կարող է Իրանի հետ տնտեսական հարաբերությունները խորացնելու նպատակով ևս մեկ քայլ անել, այն է` բարձրացնել Իրանի դերակատարությունը ԵՏՄ շուկայում, փորձի վերացնել այն խոչընդոտները, որոնք ստեղծված են Իրանի համար:

Դեսպանը նշեց, որ Հայաստանը Իրանի հետ ամենատարբեր ոլորտներում տնտեսապես համագործակցելու մեծ դաշտ կարող է ունենալ, քանի որ Իրանը 80 միլիոն բնակչություն ունեցող մեծ երկիր է` զարգացած տնտեսությամբ: Եվ եթե այդ հնարավորությունը Հայաստանն օգտագործի, ապա դա կխթանի Հայաստանի տնտեսության զարգացումը: