ՆԱՏՕ-ն կուժեղացնի իր ռազմական ներկայությունը Բալթյան ծովում՝ նախքան Շվեդիայի և Ֆինլանդիայի միանալը. Ստոլտենբերգ

ՆԱՏՕ-ի գլխավոր քարտուղար Իենս Ստոլտենբերգը հայտարարել է, որ Հյուսիսատլանտյան դաշինքի երկրները մտադիր են մեծացնել իրենց ռազմական ներկայությունը Բալթյան տարածաշրջանում, որպեսզի ապահովեն Շվեդիայի և Ֆինլանդիայի անվտանգությունը մինչև այդ երկրների՝ դաշինք մտնելը։ Այս մասին հայտնում է ՏԱՍՍ-ը։

Նրա խոսքով՝ դաշինքը նախատեսում է ուսումնասիրել ՆԱՏՕ-ում Շվեդիայի և Ֆինլանդիայի համար անվտանգության երաշխիքներ տրամադրելու հնարավորությունը՝ մինչև նրանց՝ այդ կազմակերպություն մտնելը։ Դա նախատեսվում է անել Բալթյան տարածաշրջանում դաշինքի ներկայության ուժեղացմամբ։

«Իհարկե, բոլոր որոշումները կընդունվեն Ֆինլանդիայի և Շվեդիայի հետ սերտ համագործակցությամբ»,- ասել է Ստոլտենբերգը:

Նրա խոսքով՝ դաշինքը նախատեսում է արագ փոխզիջում գտնել Թուրքիայի հետ Ֆինլանդիայի և Շվեդիայի՝ ՆԱՏՕ-ին միանալու հարցում, ինչպես նաև արագացնել այդ պետությունների ընդունման վերաբերյալ փաստաթղթերի վավերացումը։