Ռուսաստանը չի հանդուրժի Ֆինլանդիայի և Շվեդիայի մուտքը ՆԱՏՕ

Ռուսաստանը պարզապես չի համակերպվի Ֆինլանդիայի և Շվեդիայի՝ ՆԱՏՕ-ին անդամակցելու հետ. ասել է ՌԴ փոխարտգործնախարար Սերգեյ Ռյաբկովը՝ կոչ անելով Արևմուտքին՝ այս հարցում պատրանքներ չունենալ։

«Ռազմական լարվածության ընդհանուր մակարդակը կավելանա, իսկ կանխատեսելիությունն այս ոլորտում կնվազի: Ցավալի է, որ ողջախոհությունը զոհաբերվում է ինչ-որ ուրվական գաղափարների, թե ինչ պետք է անել ներկա իրավիճակում»,- ընդգծել է դիվանագետը։

ՌԴ փոխարտգործնախարարը պարզաբանել է, որ այս ամբողջ իրավիճակը Շվեդիայի և Ֆինլանդիայի ղեկավարության սխալն է՝ հեռահար հետևանքներով, դա ցույց է տալիս այս երկրներում որոշումներ կայացնողների մակարդակը։

«Այս ամենը լրիվ կեղծիքի և զեղծարարության արտացոլումն է այն բանի, թե ինչ է տեղի ունենում Արևմուտքի և, մասնավորապես, Հյուսիսային Եվրոպայի երկրների քաղաքականություն մշակողների կողմից: Այն փաստը, որ Շվեդիայի, ինչպես նաև Ֆինլանդիայի անվտանգությունը, չի ամրապնդվի այս որոշման արդյունքում, մեզ համար միանգամայն ակնհայտ»,- շարունակել է Ռյաբկովը։

Նա հավելել է, որ առանձին խնդիր է, թե Ռուսաստանը ինչպես կապահովի իր անվտանգությունը ՆԱՏՕ-ի ընդհանուր կառուցվածքի փոփոխությունից հետո․ նրա որոշումը կախված կլինի Հյուսիսատլանտյան դաշինքին երկու երկրների անդամակցության կոնկրետ հետեւանքներից։